Roboti godet klientin në një dyqan teknologjie pasi ai e shtyu për shaka

Pamjet e publikuara nga një dyqan teknologjie në Rusi janë përhapur me shpejtësi në rrjetet sociale, pasi në to një robot humanoid duket se sulmon një klient duke përdorur lëvizje të ngjashme me ato të arteve marciale.

Videoja është xhiruar në ambientet e dyqanit “Volga Electronics” në Saratov. Në të shihet roboti teksa afrohet drejt një burri që sapo ka hyrë brenda.

Burri i zgjat dorën robotit në shenjë përshëndetjeje, por, pasi nuk merr asnjë reagim, e shtyn lehtë në formë shakaje.

Pas vetëm disa sekondash, roboti duket se reagon duke lëshuar një varg goditjesh me grushte dhe këmbë ndaj klientit.

Dy punonjës ndërhyjnë pa vonesë për ta ndaluar dhe përpiqen ta mbajnë, ndërkohë që roboti vazhdon tentativat për ta goditur burrin.

https://www.dailymail.com/embed/video/3706229.html

Ende nuk dihet nëse bëhet fjalë për një incident të vërtetë apo për një skenë të organizuar për promovim. Dyshimet se videoja mund të jetë pjesë e një fushate publicitare janë shtuar pikërisht sepse pamjet u publikuan nga vetë dyqani.

Videoja nxit diskutime mbi sigurinë e robotëve

Pas shpërndarjes së gjerë të videos në rrjetet sociale, shumë përdorues kanë shprehur shqetësime dhe kanë ngritur pikëpyetje rreth rreziqeve të mundshme nga robotët humanoidë.

“Makineritë po përgatiten të marrin kontrollin. Na kishin paralajmëruar”, shkroi me ironi një përdorues në platformën X.

Një komentues tjetër paralajmëroi se ngjarje të këtij lloji mund të përsëriten më shpesh, nëse inteligjenca artificiale dhe robotika avancojnë pa masa të mjaftueshme sigurie.

Megjithatë, kjo nuk është hera e parë që një robot shfaqet duke ekzekutuar teknika të arteve marciale.

Në Kinë, një robot me paruke goditi një fëmijë

Vetëm disa javë më parë, gjatë një demonstrimi të arteve marciale në Kinë, një robot humanoid me paruke të stilit afro goditi në bark një fëmijë.

Rasti u regjistrua në Kopshtin Botanik të Urumqit, në Xinjiang, ku roboti po prezantonte aftësitë e tij përpara një grupi vizitorësh.

Në një moment të performancës, roboti u vendos në pozicion luftimi dhe kreu një goditje rrotulluese me këmbë.

Këmba e tij goditi papritur dhe drejtpërdrejt në bark një djalë të vogël që qëndronte pranë. Fëmija u përkul nga dhimbja dhe më pas ra mbrapsht drejt turmës.

Roboti humbi për pak çaste ekuilibrin pas goditjes, por arriti të stabilizohej dhe vijoi demonstrimin.

Edhe pamjet e këtij incidenti u përhapën gjerësisht, duke rikthyer diskutimet mbi sigurinë e robotëve të avancuar.

Aftësitë fizike të robotëve po bëhen gjithnjë e më të avancuara

Në një rast tjetër gjatë këtij viti, dhjetëra robotë u shfaqën në skenën e galasë së Festivalit të Pranverës të televizionit CCTV, një prej programeve me audiencën më të madhe në Kinë.

Gjatë numrit artistik, ata realizuan goditje me këmbë, salto dhe teknika të ndryshme të arteve marciale.

Koreografia përfshiu gjithashtu përdorimin e nunchakuve, shpatave dhe shkopinjve nga disa prej robotëve.

E gjithë performanca u zhvillua vetëm pak metra larg fëmijëve pjesëmarrës në program.

Këto raste të fundit kanë intensifikuar diskutimin se si duhet të programohen dhe kontrollohen robotët humanoidë, veçanërisht kur ndërveprojnë drejtpërdrejt me publikun. /GazetaExpress/