Kufijtë e inteligjencës artificiale: Çfarë nuk arrin të realizojë?

Sipas Maximilian Kiener nga Instituti për Etikën në Teknologji pranë Universitetit Teknik të Hamburgut, inteligjenca artificiale është në gjendje të kryejë llogaritje, por vendimin përfundimtar duhet ta marrin gjithmonë njerëzit.

Qoftë si mbështetje për orientimin në karrierë apo si zëvendësues i një terapisti – inteligjenca artificiale duket se ka një përgjigje të gatshme për thuajse çdo problem. Pothuajse pa përjashtim, zhvilluesit i projektojnë këta asistentë virtualë të jenë të sjellshëm dhe jo kritikë.

Megjithatë, Maximilian Kiener paralajmëron se kjo përbën një iluzion të rrezikshëm, të cilit përdoruesit i besojnë tepër shpesh. “Ajo që nuk funksionon janë gjykimet mbi vlerat. Cilën rrugë profesionale të zgjedh? A duhet të bëhem avokat apo mjek? Këtu nuk ekziston një përgjigje e vetme. Problemi që del vazhdimisht është se ne përpiqemi t’i paketojmë të gjitha çështjet komplekse në një format të IA-së”, shpjegon ai.

A përbëjnë risi deepfakes?

Temat si vetmia ose arsimi shpesh janë çështje sociale. Kjo nuk është një detyrë që inteligjenca artificiale mund ta zgjidhë në rrugë teknike. Maximilian Kiener nuk sheh ndonjë risi në disa nga aplikacionet më të reja të IA-së.

“Gjërat që janë thjesht të reja nuk janë inovacione. Për shembull, e kam shumë të vështirë t’i quaj inovacione imazhet e rreme të fëmijëve,” shton ai.

Sipas studiuesit, etika nuk e pengon zhvillimin e inteligjencës artificiale, por e bën atë vërtet të dobishme për njerëzit. Kiener thekson se rezultati më i mirë arrihet kur IA dhe njerëzit bashkëpunojnë që në fillim për të gjetur së bashku zgjidhje.

Një chatbot që shtron pyetje

Matthias Uhl, profesor i etikës së biznesit dhe asaj sociale në Universitetin e Hohenheim, ka zhvilluar një chatbot sokratik: “IA sokratike ndryshon nga ajo konvencionale sepse bën pyetje dhe më ndihmon të gjej zgjidhjen time për problemin, në vend që të më furnizojë me përgjigje të drejtpërdrejta.”

Një ekip nga Universiteti i Hohenheim dhe Universiteti i Bambergut e testoi këtë model gjuhësor në disa eksperimente. Rezultati tregoi se chatbot-i i përshtatur ishte në gjendje t’i ndihmonte përdoruesit të merrnin vendime më të balancuara nga ana morale.

Por gjatë zbatimit, ekipi hasi edhe një pengesë, tregon Matthias Uhl. “Inteligjenca artificiale që shtron pyetje shtesë zgjidhet më rrallë. Kur njerëzit kanë mundësi të zgjedhin, ata preferojnë këshillat e drejtpërdrejta.”

Ekspertët janë shpesh më skeptikë

Ndërsa përdoruesit e zakonshëm shpesh i besojnë menjëherë IA-së, ekspertët priren të jenë më skeptikë. Për shembull në mjekësi: sistemet e IA-së mund të analizojnë radiografitë me besueshmëri dhe shpejtësi. Megjithatë, shumë mjekë e kanë të vështirë ta pranojnë këtë teknologji.

Studiuesit kanë zbuluar se ata që zotërojnë shumë njohuri i kontestojnë analizat e IA-së, edhe kur këto janë më të sakta. Matthias Uhl beson se IA e re mund të jetë një ndihmë.

“Nëse vetë sistemi e shpreh pasigurinë e tij, kjo mund të rrisë besimin e përdoruesit ndaj këshillave. Për shembull, kur IA thotë se është 90 për qind e sigurt për klasifikimin që ka bërë.”

Pritet që ekspertët mjekësorë ta testojnë sistemin e ri të inteligjencës artificiale gjatë vitit të ardhshëm./DW/