Kina vendos për herë të parë standarde të detyrueshme sigurie për automjetet autonome

Kina prezantoi të martën standardet e para kombëtare me zbatim të detyrueshëm për sigurinë e automjeteve të avancuara autonome. Sipas mediave shtetërore, ato do të nisin të zbatohen vitin e ardhshëm.

China Daily raportoi, duke iu referuar Ministrisë së Industrisë dhe Teknologjisë së Informacionit, se rregullat që përcaktojnë kërkesat e sigurisë për sistemet e automatizuara të drejtimit në automjetet inteligjente do të hyjnë në fuqi korrikun e ardhshëm.

Përpara se teknologjitë vetëdrejtuese të Nivelit 3 dhe Nivelit 4 të dalin në rrugë, standardet e miratuara u kërkojnë prodhuesve të krijojnë mekanizma sigurie që mbulojnë të gjithë procesin, nga fillimi deri në fund.

Kompanitë automobilistike duhet të vendosin gjithashtu një sistem sigurie për tërë ciklin jetësor të automjeteve, duke përfshirë fazat e projektimit, zhvillimit dhe prodhimit, si dhe funksionimin e tyre pas vendosjes në përdorim.

Përpara aktivizimit të funksioneve autonome të drejtimit, prodhuesit do të detyrohen të përdorin sisteme për administrimin e rrezikut dhe të zhvillojnë simulime, testime në pista të mbyllura dhe prova në kushte reale rrugore.

Vendimi i Pekinit merret në një kohë kur prodhuesit ndërkombëtarë të automjeteve dhe kompanitë teknologjike po konkurrojnë për ta kaluar drejtimin autonom nga ambientet e testimit në transportin e përditshëm.

Në vitin 2025, Kina miratoi aksesin me kusht për dy modele automjetesh autonome të Nivelit 3, një zhvillim që përfaqësoi një hap të parë drejt shtrirjes më të gjerë komerciale të kësaj teknologjie.

Në këto automjete, sistemet e instaluara nga prodhuesit duhet të jenë në gjendje të kontrollojnë nëse drejtuesit janë të gatshëm dhe të aftë ta rimarrin kontrollin e mjetit sa herë që kjo kërkohet.

Prodhuesit kanë edhe detyrimin që, përmes manualeve të përdorimit, faqeve të internetit dhe ekraneve brenda automjetit, t’u shpjegojnë qartë përdoruesve shkallën e automatizimit, kufijtë e funksionimit, kufizimet dhe përgjegjësitë. / AA.