Geely sjell teknologjinë që karikon baterinë e makinës elektrike për 4 minuta e 30 sekonda

Geely Auto Group ka prezantuar një sistem të ri karikimi që e rrit nivelin e baterisë së një veture elektrike nga 10 në 70 për qind brenda vetëm katër minutash e 30 sekondash.

Kompania kineze, e cila zotëron edhe Volvo-n, thotë se ka integruar inteligjencën artificiale për të përmirësuar mënyrën se si karikohen bateritë.

Performanca është verifikuar gjatë testimeve reale, ku automjetet e Geely-t arritën të kalonin nga 10 në 70 për qind për 4 minuta e 30 sekonda.

Ky rezultat është rreth 30 sekonda më i shpejtë se ai i sistemit më të avancuar të rivalit BYD, i cili për të njëjtin interval kërkon afërsisht pesë minuta.

Në themel të platformës së re “Smart Charging” qëndron Xingrui PowerMind, një model i inteligjencës artificiale i krijuar në bashkëpunim me kompaninë StepFun.

Teknologjia lidh dhe bashkërendon automjetin, baterinë, pikën e karikimit, shërbimet cloud, rrjetin elektrik dhe pajisjet për ruajtjen e energjisë.

Falë këtij koordinimi, procesi nuk përbëhet thjesht nga furnizimi i baterisë me energji, por përshtatet në vazhdimësi sipas gjendjes së saj dhe faktorëve të tjerë.

Inteligjenca artificiale parashikon temperaturën e baterisë

Geely përdor algoritme që parashikojnë rritjen e temperaturës së baterisë, në vend që të presin derisa ajo të nxehet përpara se të ndërhyjnë.

Sistemi mund ta parashikojë temperaturën deri në 30 sekonda më herët dhe ta ndryshojë fuqinë e karikimit në mënyrë dinamike.

Sipas prodhuesit, gjatë karikimit temperatura mesatare duhet të mbetet nën 55 gradë Celsius, ndërsa kufiri maksimal është vendosur në 65 gradë.

Kontrolli termik mbështetet edhe nga një mekanizëm ftohjeje me lëng, i cili monitoron të gjithë zinxhirin e karikimit: nga bateria e ruajtjes së energjisë dhe pika e furnizimit, te kablloja, porta e karikimit dhe bateria e automjetit.

Nga 10 në 97 për qind për më pak se nëntë minuta

Zgjidhja e re u provua në modelet Lynk & Co 10 dhe Zeekr 001.

Të dhënat e testimeve treguan se të dyja veturat e përfunduan karikimin nga 10 në 70 për qind për më pak se pesë minuta.

Kur niveli u rrit nga 10 në 97 për qind, koha e nevojshme ishte vetëm tetë minuta e 40 sekonda.

Geely thekson se objektivi i sistemit nuk është vetëm ulja e kohës së pritjes, por edhe mbrojtja e jetëgjatësisë së baterisë.

Për secilin automjet dhe bateri përcaktohet një plan i veçantë karikimi, ku rregullohen rryma maksimale, fuqia e ftohjes dhe kohëzgjatja e procesit.

Teknologji që synon zgjatjen e jetëgjatësisë

Një tjetër element i platformës është teknologjia që Geely e quan “rikthimi me impulse të joneve të litiumit”.

Ajo bazohet në mikro-impulse elektrike, të cilat synojnë të riaktivizojnë jonet e litiumit që mund të grumbullohen në elektrodën negative pas një numri të madh ciklesh karikimi të shpejtë.

Kompania vlerëson se ndërthurja e këtyre zgjidhjeve mund ta rrisë me rreth 20 për qind jetëgjatësinë e cikleve të baterisë.

Prodhuesit kinezë përballen me konkurrencë gjithnjë e më të fortë

Prezantimi i Geely-t vjen disa muaj pasi BYD bëri të ditur se synon të vendosë 300 karikues ultra të shpejtë në Mbretërinë e Bashkuar deri në fund të këtij viti dhe ta çojë numrin e tyre në 600 deri në vitin 2027.

Pajisjet do të vendosen në pikat e shitjes së Denza-s, nënmarkë e BYD-it, si edhe në hapësira që menaxhohen nga operatorë ekzistues të rrjeteve të karikimit.

BYD pretendon se teknologjia e saj e mbush baterinë pothuajse në të njëjtën kohë që nevojitet për mbushjen e një rezervuari me karburant.

Për këtë performancë përdoret fuqi karikimi deri në 1.5 megavat.

Kjo shifër është rreth dhjetë herë më e lartë se fuqia prej 150 kW që ofrohet nga shumë karikues të shpejtë për vetura elektrike.

Karikuesit mund të përdoren nga çdo veturë elektrike me lidhje standarde CCS, megjithëse shpejtësia e karikimit do të përcaktohet nga sasia e energjisë që bateria mund të pranojë në mënyrë të sigurt.

BYD ka sqaruar se arritja e fuqisë maksimale kërkon softuerin e saj të posaçëm dhe gjeneratën e re të baterisë Blade Battery 2.0.

Zhvillimet e fundit tregojnë se koha e karikimit po shndërrohet në një nga drejtimet kryesore të rivalitetit mes prodhuesve të veturave elektrike. /GazetaExpress/