DoorDash po sjell dërgesat me dron, pasi ndërtoi më parë bazën tokësore

DoorDash po hyn në tregun e dërgesave ajrore, por rrugëtimin drejt përdorimit të dronëve e nisi duke zgjidhur problemet e logjistikës në tokë.

Përpara se të projektonte mjetin autonom fluturues, kompania përcaktoi mënyrën e përgatitjes së porosive, marrjes së tyre në restorante, ngarkimit dhe paketimit për transport.

Avioni i ri autonom, i pajisur me gjashtë helika, u prezantua gjatë eventit vjetor Dash Forward 2026.

Shërbimi i ri quhet DoorDash Air dhe është krijuar nga DoorDash Labs, divizioni i kërkimit dhe zhvillimit që ka ndërtuar më herët edhe robotin autonom të trotuareve, Dot.

DoorDash Labs ka zhvilluar gjithashtu Autonomous Delivery Platform, ose ADP, një sistem softuerik që bashkërendon dërgesat përmes korrierëve njerëzorë, robotëve të trotuareve dhe dronëve.

ADP përdor një sistem inteligjent për planifikimin e itinerareve. Në vendimmarrje përfshihen kushtet e motit, distanca që duhet të përshkohet në ajër dhe trafiku në tokë, në mënyrë që të përcaktohet nëse një porosi është e përshtatshme për dërgim me dron.

Qasja e DoorDash, e cila e vendos fillimisht sistemin dhe më pas pajisjen fizike, mbështetet te të dhënat që kompania ka mbledhur gjatë viteve.

Edhe pse DoorDash nuk njihet si kompani hardware-i, ajo disponon rreth 13 vjet të dhëna mbi zakonet e klientëve dhe mënyrën se si funksionojnë restorantet në platformën e saj.

Kompania ka deklaruar më herët se në tregun e saj të dërgesave marrin pjesë më shumë se 500 mijë restorante.

Sipas DoorDash, përmasat dhe kapaciteti i DoorDash Air janë përcaktuar duke analizuar historikun e porosive, peshën mesatare të tyre dhe distancat që zakonisht mbulojnë.

“Nuk nisëm me pyetjen se çfarë mund të fusnim brenda një droni”, tha Harrison Shih, drejtues i DoorDash Air.

“U nisëm nga porositë e njerëzve dhe nga mënyra reale e funksionimit të bizneseve lokale, pastaj ndërtuam të gjithë sistemin mbi këto nevoja.”

Planet për biznesin e dërgesave me dron u bënë publike nga DoorDash që në korrik, pasi kompania siguroi certifikimin Part 135 nga Administrata Federale e Aviacionit të SHBA-së, FAA.

Ky autorizim i mundëson DoorDash të operojë ligjërisht shërbime komerciale të dërgesave me dron në Shtetet e Bashkuara.

Droni përdor gjashtë helika me rrotullim relativisht të ngadaltë, të vendosura në skajet e krahëve.

Për marrjen, transportin dhe zbritjen e pakove, mjeti ka një mekanizëm ngritës me kabllo.

Testet e para të shërbimit do të zhvillohen në Kaliforninë Veriore.

Në këtë fazë, DoorDash do të bashkëpunojë me disa zinxhirë të njohur ushqimorë, mes tyre Chipotle, Popeyes Louisiana Kitchen dhe Momo N Curry.

Përmes DoorDash Air, kompania synon ta shtrijë rrjetin e saj përtej korrierëve tradicionalë dhe robotëve tokësorë, duke e përfshirë hapësirën ajrore në infrastrukturën e saj të dërgesave. /GazetaExpress/