Do t’iu dërgonte reklama të shënjestruara duke filluar nga 13 Korriku, TikTok anulon ndryshimet

TikTok anuloi ndryshimet në politikën e privatësisë për reklamimin vetëm një ditë pasi hynë në fuqi ndërsa autoritetet rregullatore të Bashkimit Evropian po studiojnë nëse janë në përputhje me rregulloren e mbrojtjes së të dhënave në BE.

I pari që ngriti alarmin ishte autoriteti Italian për mbrojtjen e të dhënave duke thënë se rrjeti social në pronësi të një kompanie Kineze kishte njoftuar përdoruesit se aplikacioni do tu dërgonte reklama të shënjestruara duke filluar nga 13 Korrik pa autorizim për përdorimin e të dhënave në pajisjet e përdoruesve.

Autoritetet Italiane kanë informuar Komisionin për Mbrojtjen e të Dhënave të Irlandës për shkelje të rregullave Evropiane nga TikTok. Autoritetet Irlandeze janë rregullatori Evropian i TikTok dhe shumë bizneseve të tjera lider të internetit.

“Pas komunikimeve të pra ditën e djeshme (11 Korrik), TikTok ka vendosur të anulojë ndryshimet e politikës së privatësisë për ti hapur rrugë një analize nga Komisioni Irlandez për Mbrojtjen e të Dhënave,” tha DPC në një deklaratë zyrtare.

Rasti është dërguar tek autoritetet e 27 vendeve anëtare të Unionit.

TikTok, një rrjet social i cili shënoi një rritje të madhe veçanërisht tek të rinjtë, konfirmoi anulimin e ndryshimeve në Evropë por mbrojti planet për reklamimin e shënjestruar.

“Ne besojmë se reklamimi i personalizuar ofron eksperiencën më të mirë për komunitetin tonë dhe na sjell në një linjë me praktikat e aplikuara nga industria ndërsa jemi të gatshëm të adresojmë shqetësimet e autoriteteve rregullatorë,” tha një përfaqësues i kompanisë.

Autoritetet Italiane mirëpritën vendimin e TikTok duke e quajtur një reagim të përgjegjshëm. Kompanitë që operojnë në Evropë mund të përballen me gjoba deri në 4% të të ardhurave vjetore nëse shkelin rregullat e privatësisë.

DPC aktualisht është duke hetuar TikTok për dy raste të tjera që kanë të bëjnë me përpunimin e të dhënave personale të fëmijëve dhe transferimin e të dhënave në Kinë.