Toyota Starlet merr vlerësim zhgënjyes në provat e sigurisë

Toyota Starlet ka regjistruar një rezultat që asnjë prodhues nuk do të donte ta shihte në Afrikën e Jugut. Ky model i vogël urban, që nuk tregtohet në Evropë, por gëzon popullaritet të madh në Afrikën e Jugut te blerësit që synojnë një makinë të arsyeshme dhe me kosto të përballueshme, u vlerësua me zero yje për mbrojtjen e pasagjerëve të rritur në testimin më të fundit të sigurisë nga Global NCAP.

Pavarësisht tregut ku ofrohet apo modelit në fjalë, ky është një rezultat i sikletshëm për Toyotan, markë që prej dekadash ka ndërtuar reputacionin e saj mbi besueshmërinë, cilësinë dhe perceptimin e sigurisë.

Rasti në fjalë nxjerr në pah edhe një aspekt tjetër të kësaj praktike. Kur një automjet i një marke del në treg me një emër tjetër, konsumatori zakonisht pret nivelin e standardeve të markës, logoja e së cilës shfaqet në kapakun e motorit, edhe kur vetë automjeti është produkt i një logjike tjetër biznesi.

Versioni i Starlet-it i testuar ishte i pajisur vetëm me kontroll elektronik të stabilitetit dhe dy airbag-e të përparme si elemente sigurie. Pas përplasjes ballore, Global NCAP e cilësoi si të paqëndrueshme strukturën e karrocerisë dhe zonën e këmbëve, duke arritur në përfundimin se karroceria nuk do të përballonte ngarkesa shtesë. Ndërkohë, testi i përplasjes anësore la një përshtypje edhe më negative.

Për shkak se mungonin airbag-ët anësorë, mbrojtja për kokën dhe kraharorin rezultoi e dobët, ndërsa ajo për barkun u vlerësua vetëm si e pranueshme. Rezultati ishte aq negativ, sa Global NCAP nuk zhvilloi fare testin shtesë anësor në poli. Me fjalë të tjera, automjeti nuk dështoi prej një mangësie të vetme, por nga një ndërthurje problemesh strukturore dhe një niveli shumë modest të pajisjeve të sigurisë pasive.

Sa i përket mbrojtjes së fëmijëve, vlerësimi ishte disi më i mirë, por sërish jo plotësisht bindës. Starlet mori tre yje në këtë kategori, megjithatë kukulla që përfaqësonte një fëmijë trevjeçar goditi kokën në kornizën e brendshme gjatë një përplasjeje ballore, ndërsa rrezik i shtuar u evidentua edhe në një goditje anësore./Indeksonline/