Toyota përgatit V8-shin e ri 4.0-litërsh me 640 kuaj/fuqi

Një motor i ri V8 4.0-litërsh me dy turbo është zhvilluar nga Toyota dhe pritet të shfaqet për herë të parë në superveturën e ardhshme Toyota GR GT. Njësia e fuqisë përfshin disa zgjidhje teknike jo të zakonshme.

Turbo-kompresorët janë pozicionuar në hapësirën ndërmjet dy rreshtave të cilindrave, një prej karakteristikave kryesore të këtij motori. Falë kësaj skeme, gazrat e shkarkimit përshkojnë një rrugë më të shkurtër, duke mundësuar përgjigje më të shpejtë të motorit. Ky konfigurim ndihmon gjithashtu që njësia të montohet më poshtë në shasi, çka përmirëson qendrën e gravitetit të automjetit.

Sipas CarBuzz, përbërësit kryesorë mbrohen nga temperaturat ekstreme përmes një teknologjie të izolimit termik që përdoret zakonisht në avionë.

Në projektim është parashikuar edhe bashkëveprimi me një motor të vogël elektrik, i cili do të pozicionohet ndërmjet bllokut të motorit dhe transmisionit. Sistemi i kombinuar prodhon 640 kuaj/fuqi dhe 850 Nm çift rrotullues, duke u bërë motori më i fuqishëm që Toyota ka prodhuar deri më tani.

Në vend të sistemit tradicional me karter vaji, V8-shi është pajisur me lubrifikim me karter të thatë. Kjo zgjidhje i mundëson të përballojë ngarkesat e larta G gjatë vozitjes në pistë.

Debutimi i njësisë së re do të bëhet në Toyota GR GT, superveturë me motor të vendosur në pjesën e pasme dhe tërheqje në rrotat e pasme. Modeli do të ndërtohet nga alumini dhe plastika e përforcuar me fibra karboni, ndërsa masa do të shpërndahet në raportin 45:55. Pesha e parashikuar është rreth 1,660 kilogramë.

Zhvillimi i V8-shit është bërë në përputhje me rregulloret më të fundit të kategorisë GT3. Sipas këtyre kërkesave, motori i përdorur në garat GT3 duhet të ruajë të njëjtën arkitekturë bazë si varianti i homologuar për qarkullim rrugor.

Nëse kostot e prodhimit të kësaj teknologjie bien, motori mund të bëhet më i qasshëm në të ardhmen. Një zhvillim i tillë mund ta nxisë Toyotën që ta përdorë atë edhe në disa modele të ardhshme të Toyota ose Lexus. /Telegrafi/