Toyoda ngre alarmin për braktisjen e shpejtë të motorëve tradicionalë në favor të veturave elektrike

Akio Toyoda, kryetar i bordit të Toyota-s dhe një prej figurave më të njohura të industrisë së automobilave, ka shfaqur hapur rezervat e tij për orientimin masiv të prodhuesve drejt automjeteve elektrike.

Sipas tij, shqetësimi më i madh lidhet me faktin se “të gjithë po kalojnë te automjetet elektrike”, ndërsa ka shtuar se ndihet “shumë i vetmuar” kur mbron vazhdimësinë e motorëve me djegie të brendshme.

Toyoda ka këmbëngulur prej vitesh se e ardhmja e industrisë nuk duhet të mbështetet vetëm te veturat elektrike. Ai argumenton se, krahas tyre, duhet të ecë përpara edhe zhvillimi i teknologjive të tjera, përfshirë hibridet dhe motorët me hidrogjen.

Ai vlerëson se një kalim i përshpejtuar te automjetet elektrike mund të vendosë në rrezik vende pune, si edhe të lërë në vështirësi shumë përdorues në zona ku infrastruktura e karikimit ende nuk është zhvilluar mjaftueshëm.

Në deklaratat e tij, Toyoda është shprehur se vlerëson “aromën, tingullin dhe emocionin” që japin motorët tradicionalë, duke nënvizuar gjithashtu se dëshiron të mbrojë industrinë dhe rrjetin e furnitorëve që mbështeten te kjo teknologji. Megjithatë, ai ka pranuar se pjesa më e madhe e prodhuesve të mëdhenj të automobilave po e drejtojnë gjithnjë e më shumë fokusin te automjetet elektrike.

Edhe pse mban këtë qëndrim, Toyota vijon të investojë edhe në vetura elektrike, ndërsa strategjia e saj mbetet e ndërtuar mbi një gamë të gjerë teknologjish dhe jo mbi vetëm një zgjidhje të vetme.