Smart prezanton #2, modelin elektrik me dy vende që e kthen markën te origjina

Smart ka zbuluar pamjet e para të Smart #2, një model të ri plotësisht elektrik me dy ulëse, përmes të cilit kompania i rikthehet konceptit të automjetit të vogël për përdorim urban.

I konsideruar si pasardhësi shpirtëror i Fortwo-s legjendar, Smart #2 është konceptuar posaçërisht për qarkullimin në qytet. Ai është vetëm rreth 2.79 metra i gjatë dhe ruan përmasat kompakte karakteristike të markës, ndërsa pritet të renditet mes makinave elektrike më të vogla në treg.

Në fotografitë e publikuara, automjeti shfaqet ende i kamufluar, teksa po përfundon fazat e fundit të testimit përpara prezantimit zyrtar. Sipas Smart, premiera botërore pritet të mbahet në Sallonin e Automobilave në Paris dhe modeli do të ofrohet në treg vetëm me sistem tërësisht elektrik.

Për ndërtimin e tij do të përdoret platforma Electric Compact Architecture (ECA), një arkitekturë elektrike e zhvilluar enkas për automjete me përmasa shumë të vogla. Smart #2 do të ketë dy dyer dhe dy vende, ndërsa pozicionimi i rrotave pranë skajeve të karrocerisë synon të lehtësojë manovrimin në hapësirat e kufizuara urbane.

Të dhënat paraprake tregojnë se modeli synon të ofrojë autonomi deri në rreth 300 kilometra. Krahas kësaj, ai do të pajiset me teknologji bashkëkohore, nivel më të lartë sigurie dhe një kabinë të konceptuar nga e para. Brendësia është zhvilluar nga ekipi i Mercedes-Benz, me synimin për të ndërthurur funksionalitetin me elementet moderne.

Pas disa vitesh përqendrimi te automjete më të mëdha, përfshirë SUV-të elektrikë, Smart kërkon që me modelin #2 të rilidhet me identitetin fillestar të markës: një makinë kompakte, ekonomike dhe e përshtatshme për qytet.