Smart #2 sjell sërish makinën e vogël urbane elektrike me dy vende

Smart ka zbuluar pamjet e para të Smart #2, modelit të ri plotësisht elektrik me dy ulëse, përmes të cilit marka i rikthehet konceptit të saj fillestar të një automjeti të vogël për qytet.

I konsideruar pasardhësi shpirtëror i Fortwo-s legjendar, Smart #2 është konceptuar posaçërisht për qarkullimin urban. Ai ruan përmasat kompakte karakteristike të markës, me një gjatësi prej vetëm rreth 2.79 metrash, dhe pritet të jetë ndër makinat elektrike më të vogla që ofrohen në treg.

Automjeti shfaqet ende i kamufluar në fotografitë e publikuara, teksa ndodhet në etapat e fundit të testimit përpara prezantimit zyrtar. Sipas njoftimit të Smart, premiera botërore parashikohet të mbahet në Sallonin e Automobilave në Paris, ndërsa modeli do të tregtohet vetëm me sistem plotësisht elektrik.

Për ndërtimin e tij do të përdoret platforma Electric Compact Architecture (ECA), një arkitekturë elektrike e krijuar enkas për automjete me përmasa shumë të vogla. Smart #2 do të ketë dy dyer dhe dy vende, ndërsa pozicionimi i rrotave pranë skajeve të karrocerisë synon të lehtësojë manovrimin në zonat e ngushta të qytetit.

Të dhënat e deritanishme flasin për një autonomi që mund të arrijë deri në rreth 300 kilometra. Modeli pritet gjithashtu të ofrojë teknologji bashkëkohore, nivel më të lartë sigurie dhe një kabinë të konceptuar nga e para. Ekipi i Mercedes-Benz është kujdesur për dizajnin e brendshëm, duke ndërthurur funksionalitetin me detaje moderne.

Pas disa vitesh përqendrimi te automjetet më të mëdha, përfshirë SUV-të elektrikë, Smart kërkon që me këtë model të ringjallë identitetin e vet: një makinë kompakte, ekonomike dhe të përshtatshme për përdorim në qytet.