Shpejtësia rreth 70 km/h, zgjedhja më ekonomike për konsum më të ulët

Për vite me radhë, 90 km/h është cilësuar si shpejtësia ideale për të kursyer karburant. Megjithatë, një studim i ri e vendos pikën më efikase më pranë 70 km/h.

Ekonomia e një veture nuk përcaktohet vetëm nga shpejtësia. Në të ndikojnë edhe mënyra e punës së motorit, numri i rrotullimeve dhe marshi i përzgjedhur. Përdorimi i marsheve të ulëta rrit rrotullimet e motorit dhe, si pasojë, edhe konsumin.

Të dhënat e qendrës franceze të njohurive Cerema tregojnë se konsumi paraqitet në formën e një kurbe asimetrike U-je. Në intervalin nga rreth 10 deri në 40 km/h, vetura harxhon relativisht shumë, ndërsa konsumi nis të ulet gradualisht me rritjen e shpejtësisë.

Niveli më i favorshëm arrihet afërsisht në 70 km/h. Kjo shpejtësi krijon kompromisin më të mirë mes funksionimit efikas të motorit, kohëzgjatjes së udhëtimit dhe ndikimit të rezistencës së ajrit.

Mbi këtë kufi, kursimi fillon të zbehet. Rezistenca aerodinamike shtohet ndjeshëm dhe rritet në mënyrë katrore në raport me shpejtësinë. Për rrjedhojë, një veturë që lëviz më shpejt kërkon shumë më tepër energji për të përballuar rezistencën e ajrit.

Një shembull i qartë është kalimi nga 100 në 120 km/h, i cili mund të sjellë rreth 20 për qind më shumë konsum karburanti. Te veturat elektrike, kjo dukuri është edhe më e theksuar, pasi shpejtësia e lartë rrit përdorimin e energjisë dhe shkurton autonominë.

Rezultatet e testeve tregojnë gjithashtu se udhëtimi me 130 km/h, krahasuar me 110 km/h, mund të kërkojë më shumë se një të katërtën konsum shtesë. Kështu, as ecja tepër ngadalë dhe as vozitja me shpejtësi të madhe nuk përbëjnë zgjedhjen më ekonomike.

Sipas studimit, rreth 70 km/h mbetet shpejtësia që balancon më mirë konsumin, rendimentin e motorit dhe kohën e nevojshme për udhëtim.