Rimac zgjeron kontrollin mbi Bugatti-n pas marrëveshjes së re të pronësisë

Rimac ka konsoliduar pozicionin e saj në Bugatti, duke përmbyllur një marrëveshje që i jep fund pronësisë së Volkswagen Group dhe Porsche mbi markën ikonike franceze.

Pjesë e konsorciumit blerës janë HOF Capital dhe BlueFive Capital, të cilat kanë marrë 45 për qind të aksioneve që Porsche zotëronte në sipërmarrjen Bugatti Rimac.

Investitorët kanë blerë gjithashtu 21 për qind të aksioneve të Porsche në Rimac Group, në kuadër të të njëjtit transaksion.

Me finalizimin e marrëveshjes, Mate Rimac do të emërohet president i ri i Bugatti-t dhe do të marrë drejtimin e kompanisë.

Christophe Piochen do të largohet nga detyra e presidentit të Bugatti-t, si edhe nga posti i drejtorit operativ të Bugatti Rimac.

Detyrën e drejtorit të ri operativ të Bugatti Rimac do ta marrë Marko Brkljaçiq.

Vlera që Porsche pritet të përfitojë nga marrëveshja është rreth 1 miliard euro, ndërsa 250 milionë euro do të shkojnë për mbulimin e detyrimeve të pensioneve.

Ky zhvillim i siguron Mate Rimac më shumë hapësirë për të orientuar të ardhmen e Bugatti-t, e cila aktualisht po përqendrohet te modelet hibride dhe motori V16 me fuqi të jashtëzakonshme. /Telegrafi/