Fundi i një epoke: Bugatti shkëputet nga Volkswagen Group

Bugatti po hyn në një fazë të re të historisë së saj, pasi Porsche ka përmbyllur shitjen e aksioneve që zotëronte në Bugatti Rimac dhe Rimac Group. Ky zhvillim i jep fund lidhjes së drejtpërdrejtë të Volkswagen Group me markën prestigjioze, pas afro tri dekadash.

Transaksioni u finalizua më 9 shtator, pasi u morën të gjitha miratimet e nevojshme nga autoritetet rregullatore. Porsche pritet të arkëtojë rreth 1 miliard euro, ndërsa 250 milionë euro nga kjo shumë do të përdoren për detyrimet e kompanisë ndaj fondeve të pensioneve.

Shitja mund të interpretohet si pjesë e riorganizimit të portofolit të Porsche-s dhe e përqendrimit të saj te aktiviteti kryesor. Megjithatë, në një kuadër më të gjerë, ajo shënon përfundimin e përfshirjes së drejtpërdrejtë të Volkswagen Group në Bugatti, marrëdhënie që daton nga viti 1998.

Atë vit, Ferdinand Piëch, drejtori ekzekutiv i Volkswagen Group, siguroi të drejtat e emrit Bugatti. Synimi i tij nuk ishte vetëm shtimi i një marke tjetër luksoze në një portofol që po zgjerohej me shpejtësi. Piëch kishte një objektiv shumë më ambicioz.

Gjatë vitit 1998, Volkswagen bleu Bugatti-n, Lamborghini-n dhe Bentley-n, si pjesë e përpjekjes për të forcuar praninë në tregun e automjeteve luksoze.

Mes këtyre projekteve, ai i Bugatti-t ishte më radikali. Piëch dëshironte të krijonte një automjet që do të tejkalonte kufijtë e asaj që industria automobilistike e konsideronte teknikisht të realizueshme, transmeton Telegrafi.

Kështu lindi Bugatti Veyron, hipermakina me rreth 1,000 kuaj fuqi. Modeli u kthye në një prej projekteve më të rëndësishme automobilistike të viteve 2000 dhe e pozicionoi Bugatti-n moderne në një nivel krejt të veçantë.

Që prej atëherë, marka u lidh me automjete shumë të fuqishme, të prodhuara në sasi të kufizuara dhe me çmime jashtëzakonisht të larta.

Roli i Piëch në formësimin e Bugatti-t të sotëm ishte aq i rëndësishëm, sa vetë marka ka pranuar se pa të nuk do të ekzistonte në formën aktuale. Pas vdekjes së tij në vitin 2019, Porsche filloi të luante një rol gjithnjë e më të madh në të ardhmen e kompanisë.

Në vitin 2021, Porsche dhe Rimac themeluan Bugatti Rimac. Rimac Group mori 55 për qind të aksioneve, ndërsa Porsche zotëronte 45 për qind. Paralelisht, Porsche kishte një pjesëmarrje prej 20.6 për qind në Rimac Group.

Struktura e re synonte të bashkonte përvojën e Bugatti-t në motorët me djegie të brendshme me njohuritë e Rimac në fushën e teknologjisë elektrike.

Bashkëpunimi çoi në krijimin e disa prej modeleve më të veçanta të historisë së afërt të Bugatti-t. Pas Chiron-it, marka prezantoi Mistral dhe më pas Tourbillon, duke bërë të qartë se nuk synonte të kthehej thjesht në një prodhues tjetër të hipermakinave elektrike.

Tourbillon ka një rëndësi të veçantë, pasi pajiset me një motor V16 atmosferik të kombinuar me një sistem hibrid. Ky konfigurim tregon se elektrifikimi, për Bugatti-n, nuk do të thotë medoemos heqje dorë nga motorët me djegie.

Me përfundimin e marrëveshjes, Porsche tashmë është larguar nga struktura e Bugatti Rimac.

Aksionet e saj janë blerë nga një konsorcium i drejtuar nga HOF Capital, ku përfshihet edhe BlueFive Capital, kompani me bazë në Abu Dhabi.

Rimac Group vazhdon të jetë aksionari shumicë i Bugatti Rimac. Ndërkohë, Mate Rimac do të mbajë edhe detyrën e presidentit të Bugatti Automobiles, përveç postit të CEO-s së Bugatti Rimac.

Porsche e lidh vendimin për t’u larguar me nevojën për t’u fokusuar te biznesi kryesor dhe te investimet për modelet e ardhshme. Kompania po zhvillon pasardhësin e gjeneratës së parë të Macan-it, ndërsa po përgatit variante elektrike të Boxster dhe Cayman. Në të njëjtën kohë, ajo planifikon rikthimin e versioneve me motorë benzine.

Përveç këtyre projekteve, Porsche po vlerëson mundësinë e një SUV-i me tre radhë ulësesh, një modeli të ri GT dhe madje edhe të një hipermakine të re.

Për Bugatti-n, përfundimi i rolit të Porsche-s shihet si hapja e një kapitulli të ri dhe jo si mbyllja e një epoke.

Marka franceze me bazë në Molsheim po e nis këtë fazë me Rimac në drejtimin e saj dhe me një grup të ri investitorësh, të cilët pritet të sigurojnë kapitalin e nevojshëm për zbatimin e vizionit afatgjatë të Mate Rimac.

Perspektiva e kompanisë duket e qëndrueshme. Sipas raportimeve, Bugatti i ka shitur tashmë të gjitha automjetet deri në vitin 2029, çka e bën pjesën e mbetur të kësaj dekade veçanërisht premtuese për një prej markave më ekskluzive të industrisë së automobilave. /Telegrafi/