Mercedes dhe Nvidia thellojnë bashkëpunimin për drejtimin autonom të Nivelit 4

Zhvillimi i një sistemi të ri të drejtimit autonom do të jetë në qendër të partneritetit të zgjeruar mes Mercedes dhe Nvidia. Dy kompanitë e bënë sot të ditur këtë hap, duke njoftuar se do të vijojnë punën për teknologjinë e gjeneratës së ardhshme.

Synimi i bashkëpunimit është arritja e Nivelit 4 sipas standardeve SAE. Në këtë nivel, sistemi merr përsipër të gjithë drejtimin e automjetit dhe u përgjigjet në kohën e duhur problemeve që shfaqen, për sa kohë mjeti ndodhet brenda kushteve të përcaktuara të funksionimit. Kështu, nuk kërkohet që një person të ndërhyjë për të marrë kontrollin.

Niveli 4 mbetet një shkallë poshtë Nivelit 5, që përfaqëson në thelb automatizimin e plotë, pa kufizime lidhur me rrugët apo kushtet në të cilat drejtohet automjeti.

Mercedes u bë prodhuesi i parë i automjeteve që siguroi në Evropë miratimin për drejtim autonom të Nivelit 3. Megjithatë, sistemi i tij vazhdon të ketë kufizime të shumta: një automjet i pajisur me këtë teknologji (ADAS) mund të lëvizë deri në 95 km/orë dhe ta përdorë atë vetëm në disa autostrada të caktuara.

I quajtur nga Mercedes “Driver Pilot”, ky sistem është fryt i bashkëpunimit me Nvidia.

Në zhvillimin e teknologjisë, Mercedes kontribuoi me njohuritë e veta për sigurinë dhe integrimin, ndërsa pjesa teknologjike u sigurua nga Nvidia. Arkitektura për sensorët dhe përpunimin e të dhënave në automjet është “Nvidia Hyperion”. Për vendimmarrjen përmes inteligjencës artificiale shërben softueri i drejtimit “Nvidia Alpamayo Stack”.

Siguria mbështetet te “Nvidia Halos”, një sistem që përfshin mekanizma mbrojtës dhe redundancë, pra dublim të sistemeve.

Dy kompanitë nënvizojnë gjithashtu se platforma “Hyperion” e Nvidia-s do të lidhet më ngushtë me MB.OS, sistemin operativ të Mercedesit.