Mercedes-AMG jep sinjalet e para për SUV-in e ardhshëm elektrik

Mercedes-AMG ka publikuar fotografitë e para të SUV-it të ri me energji elektrike, i konceptuar si varianti crossover i GT 4-Door.

Pamjet e automjetit janë shpërndarë nga kompania gjermane në rrjetet sociale, së bashku me premtimin për performancë të lartë dhe elemente stilistike tipike të AMG-së.

SUV-i karakterizohet nga pjesa ballore e gjerë, dritat e ditës me formë ylli, parafangot e spikatura dhe çatia me profil sportiv. Në pjesën e pasme vërehen ngjashmëri me GT 4-Door, megjithëse dritat do të kenë një dizajn të veçantë.

Kabina pritet të ndjekë konceptin e brendshëm të versionit sedan. Ajo parashikohet të pajiset me panel digjital 10.2-inç, ekran qendror 14-inç dhe një ekran të dedikuar për pasagjerin. Lista e pajisjeve pritet të përfshijë gjithashtu ulëse sportive, timon të rrafshuar në pjesën e poshtme, karikues pa kabllo dhe çati panoramike.

Varianti 53 do të përdorë dy motorë elektrikë, të cilët së bashku do të prodhojnë 536 kuaj/fuqi dhe 800 Nm çift rrotullues. Sipas ciklit WLTP, bateria me kapacitet rreth 106 kWh do të sigurojë autonomi deri në 809 kilometra.

Në ofertën e Mercedes-AMG pritet të përfshihet edhe versioni më i fuqishëm 63, i pajisur me tre motorë. Ky sistem do të gjenerojë deri në 1,153 kuaj/fuqi dhe 2,000 Nm çift rrotullues. Automjeti pritet të arrijë nga 0 në 100 km/h brenda vetëm 2.4 sekondash, ndërsa shpejtësia maksimale do të jetë 300 km/h.

Dalja në shitje e modelit të ri elektrik të Mercedes-AMG parashikohet për në fund të këtij viti.