Dy drejtues padisin Mercedesin, thonë se emblema AMG i dogji

Mercedes është përballur me një padi kolektive nga dy drejtues automjetesh Mercedes-AMG, të cilët thonë se janë djegur nga emblema metalike AMG e montuar në ulëset e shoferit.

Në dokumentet e paraqitura pranë një gjykate në Kaliforni, Gabriel Lahijani dhe Karendeep “Karina” Bath pretendojnë se ekspozimi në diell e nxeh logon në nivele të tilla sa ajo mund të shkaktojë djegie.

Sipas paditësve, problemi buron nga dizajni i ulëseve të përparme në disa modele Mercedes-AMG. Ata argumentojnë se emblema metalike AMG, për shkak se është e ngritur, mund të prekë drejtpërdrejt qafën, shpatullat ose pjesën e sipërme të shpinës së drejtuesit.

Gabriel Lahijani, i cili jeton në Los Angeles, kishte marrë me qira një Mercedes-AMG E-Class të ri të vitit 2026. Ai thotë se më 31 maj, pasi hipi në makinë me një bluzë pa mëngë, pësoi djegie të shkallës së parë dhe të dytë në shpinë.

Padia thekson se dëmtimi u dokumentua nga një dermatolog, i cili e cilësoi atë si një djegie që kishte marrë formën e logos “AMG”.

Një rast i ngjashëm pretendohet se i ndodhi Bath rreth gjashtë javë më pas. Dokumentet gjyqësore bëjnë të ditur se ajo hyri në Mercedes-AMG-në e saj pasi automjeti kishte qëndruar i parkuar në diell dhe shpatulla i preku emblemën metalike të ulëses. Sipas saj, ndjesia e djegies u shfaq menjëherë.

Gjatë ditëve që pasuan, në lëkurën e saj u bë e dukshme një shenjë me konturet e logos AMG, e cila u errësua. Paditësit e konsiderojnë këtë si tregues të një djegieje të shkaktuar nga kontakti termik.

Lahijani dhe Bath kërkojnë nga Mercedes kompensim për kostot mjekësore, si edhe për dhimbjen, vuajtjet dhe shqetësimin emocional që pretendojnë se u janë shkaktuar.

Përveç kësaj, ata kërkojnë që kompania të paguajë shpenzimet për largimin e logos AMG nga ulëset e automjeteve të pronarëve të tjerë që mund të jenë prekur nga defekti i pretenduar.