Chevrolet sjell përmirësime në Trax dhe Trailblazer për vitin 2027

Chevrolet ka njoftuar përditësime të rëndësishme për Trax dhe Trailblazer, dy SUV-të e saj me çmimin më të përballueshëm, të cilat do të dalin si modele të vitit 2027. Ndryshimet përfshijnë mbi 20 sisteme standarde sigurie, ekrane më të mëdha, integrimin e Google dhe inteligjencës artificiale Gemini, si dhe një variant të ri Trailblazer të krijuar për përdorim jashtë rruge.

Modelet e rifreskuara pritet të mbërrijnë te shitësit në pranverën e vitit 2027. Përveç pamjes së përditësuar, ato do të kenë edhe arkitekturë të re elektrike dhe softuerike. Ky zhvillim vjen pas një viti rekord, gjatë të cilit Chevrolet deklaron se ka dorëzuar së bashku më shumë se 250 mijë automjete Trax dhe Trailblazer.

Arkitektura e përmirësuar elektronike u ka mundësuar dy modeleve të përfshijnë më shumë se 20 funksione standarde të sigurisë dhe asistencës për drejtuesin. Lista përfshin frenimin automatik gjatë ecjes mbrapa, sinjalizimin për çiklistët që ndodhen në anët e automjetit, frenimin kur zbulohet trafik kryq prapa, asistencën për parkim përpara dhe frenimin automatik emergjent në kryqëzime.

Gjithashtu, në pajisjet e tyre do të vazhdojnë të jenë kontrolli adaptiv i shpejtësisë, sensorët e parkimit përpara dhe prapa, sedilja me sinjalizim përmes dridhjeve dhe asistenca e drejtimit në zonat e pikave të verbra, transmeton Telegrafi.

Në brendësi, të dy SUV-të do të pajisen standard me një ekran 11-inç për informacionet e drejtuesit dhe një ekran multimedial 11.3-inç. Përmes Google të integruar dhe Gemini, përdoruesit do të mund të shfrytëzojnë shërbime dhe funksione inteligjente drejtpërdrejt nga sistemi i automjetit.

Chevrolet do të përfshijë edhe 12 muaj shërbim OnStar One. Paketa ofron internet Wi-Fi brenda automjetit dhe transmetim videosh, përveç shërbimeve të tjera të zakonshme të OnStar.

Për vitin model 2027, Trax do të jetë i disponueshëm në tri versione: modeli bazë, RS dhe Activ. Sipas Chevrolet, ky SUV mbetet një produkt kyç në segmentin e tij dhe përbën afërsisht një të pestën e shitjeve të kompanisë në këtë kategori.

Trax do të dallohet nga një grilë e re, rrota me dizajn të ndryshuar, drita të pasme plotësisht LED dhe një derë të pasme të ridizajnuar. Për herë të parë, blerësit do të kenë mundësi të zgjedhin edhe një derë bagazhi me hapje elektrike.

Versionet do të kenë dallime specifike mes tyre. Varianti bazë do të ofrojë rrota me kontrast më të theksuar, RS do të pajiset me rrota 19-inç, më të mëdhatë në gamën e modelit, ndërsa Activ do të ruajë pamjen e veçantë të pjesës së përparme. Për të dyja modelet do të jetë në dispozicion edhe ngjyra e re e kabinës Storm Sky Gray.

Ndryshimi më i madh për Trailblazer është prezantimi i versionit Z71. Chevrolet e përdor këtë emërtim që nga viti 1963, ndërsa ai u shfaq për herë të parë në gamën e kamionçinave të mëdha të markës në vitin 1988. Aktualisht, emërtimi Z71 përdoret edhe për Traverse, Tahoe, Suburban, Colorado dhe Silverado.

Trailblazer Z71 do të vijë standard me sistem aktiv me të gjitha rrotat, pezullim të projektuar për terrene të vështira, mbrojtëse për pjesën e poshtme të karrocerisë dhe goma sport-terreni. Brendësia do të kombinojë Jet Black me Storm Sky Gray dhe do të ketë elemente dekorative në ngjyrë portokalli.

Chevrolet ka riformuar edhe kabinën e Trailblazer. Leva e marsheve është vendosur në kolonën e timonit, duke krijuar më shumë hapësirë në konsolën qendrore. Kjo hapësirë tani përfshin mbajtëse gotash të tërheqshme dhe zona shtesë për vendosjen e sendeve.

Ndërhyrjet në kabinë kanë bërë të mundur edhe instalimin e daljeve të ajrit për pasagjerët e pasmë. Për herë të parë në Trailblazer do të ofrohet gjithashtu dera e bagazhit me hapje elektrike AutoSense.

Çmimet e Trax dhe Trailblazer për vitin model 2027 nuk janë bërë ende publike nga Chevrolet.