BE-ja planifikon të përgjysmojë importet e automjeteve hibride kineze

Pas vendosjes së tarifave evropiane për automjetet elektrike të prodhuara në Kinë, kompanitë e prekura orientuan eksportet e tyre drejt modeleve hibride, të cilat nisën të dërgoheshin në sasi të mëdha në tregun e BE-së.

Përballë këtij zhvillimi, Bashkimi Evropian po përgatit kufizime të reja për importet e automjeteve hibride kineze. Synimi është mbështetja e prodhuesve vendas dhe ngushtimi i deficitit tregtar me Kinën.

Marrëveshja e propozuar, e cila ende kërkon miratimin e shteteve anëtare, parashikon që numri i automjeteve hibride kineze që hyjnë në tregun evropian të përgjysmohet ose të ulet edhe më tej gjatë katër viteve të ardhshme, raportojnë mediat e huaja, përcjell Telegrafi.

Bloomberg shkruan se, ndonëse disa elemente të marrëveshjes nuk janë konfirmuar ende, kuota për vitin 2027 pritet të jetë 350,000 automjete hibride. Pas këtij viti, ajo do të rritet me 6% çdo vit.

Për të krijuar një ide mbi ndikimin e masës, këtë vit në Bashkimin Evropian pritet të importohen deri në 800,000 automjete hibride nga Kina.

Ndërkohë, sipas Financial Times, kufiri për vitin e ardhshëm mund të vendoset diku mes 500,000 dhe 700,000 automjeteve.

Eksportet kineze po fitonin me shpejtësi terren në segmentin e automjeteve hibride dhe atyre hibride “plug-in” në Evropë, ndërsa pa një kufizim të tillë markat kineze rrezikonin të merrnin pjesën më të madhe të tregut rajonal.

Gjatë gjashtë muajve të parë të këtij viti, automjetet kineze përbënin 25% të të gjitha automjeteve hibride “plug-in” të shitura në Evropë. Një vit më parë, kjo pjesë ishte vetëm 2%.

Edhe në tregun e përgjithshëm të automjeteve hibride, markat kineze arritën në 14% të shitjeve, nga 2% që ishte niveli i mëparshëm.

Kina premton të mos hakmerret

Negociatat mes zyrtarëve të Bashkimit Evropian dhe Kinës u zhvilluan në fund të javës së kaluar, me qëllim shmangien e përshkallëzimit të mosmarrëveshjeve në një konflikt më të gjerë tregtar.

Sipas raportimeve, Pekini është zotuar se nuk do të vendosë masa hakmarrëse ndaj importeve nga BE-ja si pasojë e marrëveshjes së re.

Zyrtarët evropianë vlerësojnë se marrëveshja mund të kontribuojë në uljen e deficitit tregtar me Kinën me një shumë prej 10 miliardë eurosh (11.2 miliardë dollarë) deri në 14 miliardë euro (15.6 miliardë dollarë).

Marrëveshja shihet gjithashtu si një mbështetje e rëndësishme për industrinë evropiane të automobilave, e cila është përballur me presion të shtuar nga rritja e automjeteve elektrike dhe hibride kineze.

Ky ndryshim në preferencat e konsumatorëve ka krijuar vështirësi për kompani si Volkswagen. Prodhuesi gjerman synon të shkurtojë 100,000 vende pune gjatë viteve të ardhshme, në përpjekje për të rikthyer avantazhin në konkurrencë.

Prodhimi në Evropë, zgjidhja e kompanive kineze

Kompanitë kineze duket se kanë nisur të përshtaten me kufizimet e pritshme përmes investimeve të drejtpërdrejta në Evropë.

Disa marka kanë ngritur gjatë viteve të fundit qendra prodhimi në vende të ndryshme evropiane. Kuotat, sipas të dhënave të raportuara, do të zbatohen vetëm për automjetet hibride të eksportuara nga Kina dhe jo për ato që prodhohen nga kompanitë kineze brenda territorit evropian.

BYD tashmë ka hapur një fabrikë në Hungari. Në të njëjtën kohë, edhe Dongfeng, Chery, Geely dhe Leapmotor po ndërmarrin hapa për të prodhuar automjete në Evropë.