Audi rikthen fokusin te cilësia: më pak ekrane dhe rikthim i butonave në modelet e ardhshme

Në një intervistë të dhënë për Motor1 vitin e kaluar, Audi u dallua për një qasje të pazakontë për industrinë, duke pranuar hapur se interierët e saj nuk ofrojnë më nivelin që dikur e karakterizonte markën.

Këtë e konfirmoi edhe Oscar da Silva Martins, Drejtor i Komunikimit të Produkteve dhe Teknologjisë në Audi, i cili deklaroi se “sigurisht që kanë qenë më të mirë për sa i përket cilësisë në të kaluarën”.

Në të njëjtën bisedë, kompania luksoze la të kuptohej se synon të rikthehet në standardet e mëparshme.

Pas asaj interviste, Audi prezantoi një drejtim të ri në dizajn, të emërtuar “Strive For Clarity”, i njohur gjithashtu edhe si “The Radical Next”.

Kjo gjuhë e re u shfaq për herë të parë te Concept C, një model që paralajmëron një veturë elektrike me dy vende, e cila pritet të dalë në shitje vitin e ardhshëm.

Kabina e kësaj veture sportive elektrike ndryshon plotësisht nga ajo që shihet te modelet aktuale të Four Rings.

Në këtë qasje të re, numri i ekraneve është reduktuar, disa komanda fizike janë rikthyer dhe në të gjithë ambientin e brendshëm janë përdorur materiale me cilësi më të lartë.

Concept C, tashmë afër versionit për prodhim, do të shënojë nisjen e revolucionit të ri të Audi-t për interierët, në një përpjekje për të rikthyer ato elemente që dikur i bënin kabinat e markës kaq të veçanta, përpara se ekranet dhe materialet më të lira të merrnin përparësi.