Audi rikthen A2 si veturën elektrike më efikase në historinë e markës

Audi po përgatit rikthimin e modelit të njohur A2, por këtë herë në një variant plotësisht elektrik. Prodhuesi gjerman e ka përqendruar zhvillimin te kursimi i energjisë dhe pretendon se automjeti i ri do të jetë më efikasi që ka prodhuar ndonjëherë marka.

I konceptuar si një makinë elektrike kompakte për përdorim në qytet, Audi A2 e-tron do ta ketë efikasitetin energjetik ndër karakteristikat kryesore.

Të dhënat paraprake tregojnë se varianti me 190 kuaj fuqi (140 kW), i pajisur me paketën e efikasitetit, mund të shpenzojë vetëm rreth 12,8 kWh për 100 kilometra. Kjo shifër do ta bënte atë modelin me konsumin më të ulët të Audi-t deri më sot.

Për realizimin e këtij objektivi, kompania ka punuar në formën aerodinamike të karrocerisë, duke arritur një koeficient të rezistencës së ajrit prej rreth 0,24. Përmirësime janë bërë edhe në sistemin elektrik, ku përfshihen elektronika me efikasitet më të lartë dhe një motor elektrik i optimizuar.

Kapaciteti i baterisë pritet të jetë rreth 61 kWh. Përdorimi i teknologjisë LFP (litium-hekur-fosfat) synon të ofrojë jetëgjatësi më të madhe, si dhe të mundësojë karikime të shpeshta deri në 100 për qind.

Një tjetër veçori do të jetë karikimi dykahësh. Përmes këtij funksioni, energjia e ruajtur në bateri mund të shfrytëzohet për furnizimin e pajisjeve të jashtme ose si rezervë energjetike për shtëpinë.

Dizajni dhe filozofia e A2 të ri marrin frymëzim nga modeli origjinal, i prodhuar ndërmjet viteve 1999 dhe 2005. Falë peshës së reduktuar, përdorimit të aluminit dhe aerodinamikës së përparuar, ai ishte pionier në fushën e efikasitetit dhe vlerësohej si një nga makinat më ekonomike të periudhës së tij.

Prezantimi zyrtar i Audi A2 e-tron parashikohet të zhvillohet në vjeshtën e vitit 2026. Dalja e tij në treg mund të realizohet në fund të vitit 2026 ose në fillim të vitit 2027.