Apple pëson rënie në bursë pas shtrenjtimit të disa produkteve

Vlera e aksioneve të Apple, gjigantit amerikan të teknologjisë, zbriti me afro 5,3 për qind pasi kompania vendosi të rrisë çmimet e disa prej pajisjeve të saj, raporton Anadolu.

Sot, kompania njoftoi shtrenjtimin e disa produkteve, duke e justifikuar këtë me rritjen e shpejtë dhe të ndjeshme të kostos së çipave, e cila është nxitur nga kërkesa e lartë që lidhet me zgjerimin e qendrave të të dhënave për inteligjencën artificiale.

Apple bëri të ditur se sektori i elektronikës së konsumit po përballet me vështirësi të paprecedenta.

“Deri tani kemi arritur t’i mbrojmë klientët tanë nga këto rritje, por tashmë kemi mbërritur në një pikë ku duhet të fillojmë të rrisim çmimet për një numër produktesh, përfshirë rritjet e sotme për iPad dhe Mac”, deklaroi kompania.

Rritja nuk përfshiu iPhone-in. Po ashtu, Apple nuk i ndryshoi çmimet për orën inteligjente Apple Watch dhe as për kufjet pa tela AirPods.

Çmimi fillestar i kompjuterit desktop iMac u rrit nga 1.299 dollarë në 1.499 dollarë, ndërsa ai i Mac Studio shkoi nga 1.999 dollarë në 2.499 dollarë.

MacBook Neo u përditësua nga 599 dollarë në 699 dollarë, MacBook Air 13-inç nga 1.099 dollarë në 1.299 dollarë, ndërsa çmimi fillestar i MacBook Pro u ngrit nga 1.699 dollarë në 1.999 dollarë.

Edhe iPad Pro u shtrenjtua, duke kaluar nga 999 dollarë në 1.199 dollarë, ndërsa iPad Air u rrit nga 599 dollarë në 749 dollarë.

Njëkohësisht, Vision Pro u përditësua nga 3.499 dollarë në 3.699 dollarë.