Apple çon OpenAI-n në gjykatë për përvetësim të sekreteve tregtare

Apple ka paditur OpenAI-n, me pretendimin se kompania e inteligjencës artificiale ka marrë në mënyrë të paligjshme sekrete tregtare dhe të dhëna konfidenciale për të avancuar zhvillimin e pajisjeve të saj.

Në dokumentet e dorëzuara në gjykatë, Apple pretendon se OpenAI ka punësuar ish-punonjës të saj dhe i ka nxitur të dorëzonin materiale të rezervuara, skica produktesh dhe informacione të tjera që mbroheshin rreptësisht.

Një përfaqësues i Apple deklaroi se së fundmi janë zbuluar prova të rëndësishme, të cilat tregojnë se persona të punësuar nga OpenAI mund të kenë marrë në mënyrë të paligjshme të dhëna sekrete dhe konfidenciale për teknologjitë, proceset dhe produktet ende të papublikuara të Apple.

OpenAI, ndërkaq, bëri të ditur përmes zëdhënësit Drew Pusateri se po analizonte dokumentacionin e paraqitur në gjykatë.

Pusateri tha se OpenAI nuk ka interes për sekretet tregtare të kompanive të tjera dhe se vëmendja e saj mbetet te krijimi i teknologjive novatore që fuqizojnë njerëzit në mbarë botën.

Nga bashkëpunimi te rivaliteti

Procesi gjyqësor përfaqëson një ndryshim të ndjeshëm në raportet mes dy gjigantëve teknologjikë, të cilët gjatë vitit 2024 kishin bërë publik një partneritet të rëndësishëm.

Në kuadër të asaj marrëveshjeje ishte planifikuar që chatbot-i ChatGPT të integrohej në sistemet operative të iPhone, iPad dhe Mac.

Megjithatë, në versionin e ri të asistentit zanor Siri, të prezantuar së fundmi nga Apple, pjesa e inteligjencës artificiale mbështetej te modeli Gemini i Google, në vend të ChatGPT-së.

Marrëdhëniet mes kompanive filluan të tensionoheshin pasi OpenAI pagoi 6.4 miliardë dollarë për blerjen e një kompanie pajisjesh teknologjike, të krijuar nga Jony Ive, ish-dizenjuesi i njohur i Apple.

Edhe kompania e Ive, “io Products”, është përfshirë në padinë e ngritur nga Apple.

Sipas pretendimeve të paraqitura në padi, aktiviteti i OpenAI-t në sektorin e pajisjeve teknologjike, i cili ndodhet ende në fazat fillestare, është ngritur mbi baza të paqëndrueshme dhe është cenuar thelbësisht nga përdorimi i paligjshëm i sekreteve tregtare të përvetësuara në mënyrë të gabuar.

Ish-drejtuesi i Apple, pjesë qendrore e çështjes

Dokumentet gjyqësore renditin disa ish-punonjës të Apple që më vonë kaluan te OpenAI dhe që, sipas paditëses, morën me vete të dhëna konfidenciale.

Mes personave të përmendur është Tang Yew Tan, aktualisht drejtues i sektorit të pajisjeve në OpenAI dhe më parë zëvendëspresident në Apple.

Apple pretendon se Tan zotëronte informacione për furnizuesit e saj dhe se u kishte kërkuar kandidatëve për vende pune në OpenAI të zbulonin materiale të rezervuara gjatë procesit të intervistimit.

Në padi thuhet se Tan u ka kërkuar kandidatëve që vazhdonin të punonin në Apple të sillnin në intervista “pjesë reale” nga kompania. Sipas Apple, këto pjesë përdoreshin në sesione demonstrimi, gjatë të cilave Tan dhe ekipi i tij në OpenAI mund të siguronin informacione të tjera konfidenciale.

Pretendimet për hyrje në rrjetin e brendshëm të Apple

Chang Liu është një tjetër ish-punonjës i Apple që figuron në padi dhe që më pas u punësua nga OpenAI.

Sipas akuzës së Apple, Liu mbajti një laptop të kompanisë edhe pasi u largua nga puna.

Në dokumentet e padisë pretendohet se ai mund të ketë shfrytëzuar një dobësi të sistemit të autentikimit për të hyrë në rrjetin e brendshëm të Apple. Liu dyshohet se shkarkoi prej andej “dhjetëra dokumente konfidenciale që lidheshin me pajisjet teknologjike të kompanisë”.

Një zëdhënës i Apple theksoi se kompania e trajton me seriozitet të jashtëzakonshëm mbrojtjen e punës dhe të pronësisë së saj intelektuale.

Sipas deklaratës së kompanisë, ekipet e Apple punojnë vazhdimisht për zhvillimin e teknologjive të reja, me synimin për të ofruar produktet dhe shërbimet më të mira në botë, ndaj ruajtja e punës dhe e pronësisë intelektuale të tyre konsiderohet një çështje shumë serioze.

Përmes padisë, Apple kërkon kompensim financiar dhe një vendim gjykate që t’ia ndalojë OpenAI-t mbajtjen ose përdorimin e sekreteve tregtare që, sipas saj, janë marrë në mënyrë të paligjshme. /GazetaExpress/