Apple çon OpenAI-n në gjykatë për përvetësim të dyshuar të sekreteve tregtare

Apple ka hapur një proces gjyqësor kundër OpenAI-t, me pretendimin se kompania e inteligjencës artificiale ka siguruar në mënyrë të paligjshme sekrete tregtare dhe të dhëna konfidenciale për të avancuar zhvillimin e pajisjeve të saj.

Në dokumentet e padisë thuhet se OpenAI ka punësuar ish-pjesëtarë të stafit të Apple dhe i ka nxitur të dorëzonin materiale të rezervuara, skica produktesh dhe informacione të tjera që ruheshin nën masa të rrepta sigurie nga kompania.

Një zëdhënës i Apple deklaroi se së fundmi kanë dalë prova të rëndësishme, të cilat tregojnë se persona të punësuar nga OpenAI mund të kenë marrë në mënyrë të jashtëligjshme të dhëna sekrete dhe konfidenciale për teknologjitë, proceset dhe produktet ende të papublikuara të Apple.

Drew Pusateri, zëdhënës i OpenAI-t, u përgjigj se kompania ishte duke analizuar dokumentacionin e dorëzuar në gjykatë.

Ai theksoi se OpenAI nuk ka interes për sekretet tregtare të kompanive të tjera dhe se vëmendja e saj mbetet te krijimi i teknologjive novatore që fuqizojnë njerëzit në mbarë botën.

Nga bashkëpunimi te përplasja

Procesi gjyqësor përfaqëson një ndryshim të thellë në raportet ndërmjet dy kompanive të mëdha teknologjike, të cilat gjatë vitit 2024 kishin bërë publik një partneritet të rëndësishëm.

Sipas asaj marrëveshjeje, chatbot-i ChatGPT do të integrohej në sistemet operative të iPhone, iPad dhe Mac.

Megjithatë, në versionin e ri të asistentit zanor Siri, të prezantuar së fundmi nga Apple, pjesa e inteligjencës artificiale mbështetej te modeli Gemini i Google, në vend të ChatGPT-së.

Marrëdhëniet mes kompanive u tensionuan pasi OpenAI pagoi 6.4 miliardë dollarë për blerjen e një kompanie pajisjesh teknologjike, të krijuar nga Jony Ive, ish-dizenjuesi i njohur i Apple.

Edhe kompania e tij, “io Products”, figuron si palë e përfshirë në padinë e ngritur nga Apple.

Në padi argumentohet se veprimtaria e OpenAI-t në sektorin e pajisjeve teknologjike, e cila ndodhet ende në hapat e parë, është ngritur mbi baza tepër të paqëndrueshme dhe është cenuar në themel nga përdorimi i jashtëligjshëm i sekreteve tregtare të përvetësuara në mënyrë të gabuar.

Ish-zëvendëspresidenti i Apple përfshihet në akuzat kryesore

Dokumentet gjyqësore identifikojnë disa ish-punonjës të Apple që më vonë kaluan te OpenAI dhe që, sipas pretendimeve të kompanisë, morën me vete të dhëna konfidenciale.

Mes tyre përmendet Tang Yew Tan, aktualisht drejtues i sektorit të pajisjeve në OpenAI dhe më parë zëvendëspresident në Apple.

Sipas Apple, Tan siguroi informacione për furnizuesit e kompanisë dhe u kërkoi kandidatëve për vende pune në OpenAI të zbulonin materiale të rezervuara gjatë procesit të intervistimit.

Padia pretendon se ai u ka kërkuar kandidatëve që vazhdonin të punonin në Apple të sillnin në intervista “pjesë reale” nga kompania për sesione demonstrimi, duke i dhënë atij dhe ekipit të OpenAI-t mundësinë të merrnin të tjera informacione konfidenciale të Apple.

Dyshime për hyrje në rrjetin e brendshëm të kompanisë

Chang Liu është një tjetër ish-punonjës i Apple që përmendet në padi dhe që, pas largimit, u punësua nga OpenAI.

Apple pretendon se Liu mbajti një laptop të kompanisë edhe pasi përfundoi marrëdhënien e punës.

Në padi ngrihen dyshime se ai përdori një dobësi të sistemit të autentikimit për të depërtuar në rrjetin e brendshëm të Apple, prej nga shkarkoi “dhjetëra dokumente konfidenciale që lidheshin me pajisjet teknologjike të kompanisë”.

Një përfaqësues i Apple tha se kompania i kushton rëndësi të jashtëzakonshme mbrojtjes së punës së saj dhe të pronësisë intelektuale.

Sipas kompanisë, ekipet e saj punojnë vazhdimisht për teknologji të reja me synimin që të krijojnë produktet dhe shërbimet më të mira në botë, ndaj ruajtja e punës dhe e pronësisë intelektuale të tyre trajtohet me seriozitet të lartë.

Apple kërkon kompensim financiar dhe një vendim gjykate që do t’ia ndalonte OpenAI-t mbajtjen ose shfrytëzimin e sekreteve tregtare që, sipas saj, janë marrë në mënyrë të jashtëligjshme. /GazetaExpress/