Zyrtare: Milani i beson pankinën Ruben Amorimit

Milani ka zyrtarizuar Ruben Amorimin si trajnerin e ri të skuadrës, pasi tekniku portugez ishte shkarkuar nga Manchester United në muajin janar.

Pas aventurës në Angli, ai do të nisë tani një kapitull të ri në Serie A me kuqezinjtë, të cilët sezonin e kaluar e mbyllën kampionatin në vendin e pestë.

“Ka ambicie që të shoqërojnë gjatë gjithë karrierës dhe drejtimi i Milanit ka qenë gjithmonë njëra prej tyre”.

“E di saktësisht se çfarë përfaqëson ky klub: histori, prestigj dhe një tifozëri të jashtëzakonshme në mbarë botën”.

“Është një sfidë që e pranoj me krenari dhe entuziazëm, duke qenë plotësisht i vetëdijshëm për atë që përfaqësojnë këto ngjyra”.

“Mezi pres të filloj dhe të përjetoj çdo ditë pasionin që e karakterizon Milanin”, ka deklaruar Amorim.

Rruga e tij në trajning nisi në Portugali, ku ai drejtoi fillimisht Casa Pia, më pas Braga dhe Sporting Lisbonën, përpara se të merrte drejtimin e Manchester United.

Gjithsesi, qëndrimi i tij 14-mujor në ‘Old Trafford’ mori fund në mes të sezonit të kaluar. Në atë moment, Michael Carrick u vendos si trajner i përkohshëm dhe më vonë u konfirmua përfundimisht në këtë rol.

Në një zhvillim të ardhshëm, Milani do të luajë ndaj Manchester United më 15 gusht në një miqësore parasezonale që do të zhvillohet në Poloni.