Zvicra triumfon ndaj Kanadasë, mbyll grupin në krye dhe kualifikohet bashkë me kundërshtarin

Zvicra e përfundoi me fitore fazën e grupeve në Kupën e Botës 2026, pasi mundi Kanadanë me rezultatin 2-1 dhe e mbylli grupin në vendin e parë me shtatë pikë. Pavarësisht disfatës, Kanadaja siguroi kalimin në fazën me eliminim direkt nga pozita e dytë me katër pikë.

Skuadra helvetike ishte superiore në pjesën më të madhe të ndeshjes dhe epërsia erdhi menjëherë pas nisjes së pjesës së dytë.

Në minutën e 46-të, Johan Manzambi pasoi saktë për Ruben Vargas, i cili e dërgoi topin në rrjetë për 1-0 me një goditje precize, ku topi u ndihmua edhe nga shtylla.

Edhe pse Kanadaja u përpoq të kundërpërgjigjej, Zvicra vazhdoi të krijonte më shumë rrezik para portës kundërshtare.

Goli i dytë erdhi në minutën e 57-të, kur Breel Embolo asistoi për Johan Manzambin dhe ky i fundit shënoi me qetësi, duke e çuar rezultatin në 2-0.

Ekipi i drejtuar nga Jesse Marsch nuk u dorëzua dhe u rikthye në ndeshje në minutën e 76-të. Nathan Saliba dërgoi një top të saktë në zonë, ndërsa Promise David realizoi për 2-1, duke i shtuar tensionin fundit të takimit.

Kanadezët patën një rast ideal në kohën shtesë për të barazuar. Pas një krosimi që kaloi mbi portierin Gregor Kobel, Derek Cornelius u gjend përballë portës së boshatisur, por në mënyrë të pabesueshme e dërgoi topin jashtë.

Johan Manzambi ishte një prej emrave më të spikatur të ndeshjes, duke kontribuar me një gol dhe një asistim në suksesin që i dha Zvicrës vendin e parë në grup. Një tjetër paraqitje të mirë në mesfushë bëri edhe kapiteni Granit Xhaka, i cili menaxhoi ritmin e lojës dhe organizoi aksionet e ekipit të Murat Yakinit.

Pas kësaj fitoreje, Zvicra e mbyll fazën e grupeve në krye me 7 pikë, ndërsa Kanadaja e përfundon në vendin e dytë me 4 pikë. Të dyja përfaqësueset avancojnë në fazën e eliminimit direkt të Kupës së Botës 2026.