Zidane rikthen Mbappen në krah, ylli francez i pakënaqur me rolin e ri

Kylian Mbappe shënoi golin që i dha Francës fitoren 1-0 ndaj Turqisë në Ligën e Kombeve, por mbrëmja e tij nuk përfundoi pa shqetësime, pasi sulmuesi pësoi një dëmtim në gjurin e majtë.

Përballja shënoi edhe ndeshjen e parë të Zinedine Zidane në stolin e Francës. Në debutimin e tij, trajneri francez përdori skemën 4-3-3, me Mbappen të pozicionuar në krahun e majtë, Michael Olisen në të djathtë dhe Ousmane Dembelen në qendër të repartit ofensiv.

Ky vendim, sipas L’Equipe, nuk është pritur mirë nga Mbappe. Kapiteni i Francës raportohet se ka shfaqur pakënaqësi, pasi kohët e fundit është ambientuar të luajë kryesisht si sulmues qendror.

Gjatë periudhës kur skuadra drejtohej nga Didier Deschamps, Mbappe gëzonte më shumë hapësirë për të qenë pika kryesore e sulmit. Zidane, ndërkohë, duket se synon të vendosë një mënyrë loje më të ndryshueshme.

Trajneri i ri i “Gjelave” besohet se dëshiron t’u krijojë futbollistëve më tepër liri për të përdorur aftësitë kreative, pa i kufizuar brenda një organizimi taktik tepër strikt.

Megjithatë, debutimi i Zidane u zbeh nga dëmtimi i Mbappes. Sulmuesi u zëvendësua në minutën e 59-të, vetëm pak çaste pasi kishte realizuar golin vendimtar të ndeshjes.