Zidane konfirmon shqetësimin për Mbappen: sulmuesi mund të rikthehet në Madrid

Kylian Mbappe ka pësuar një dëmtim në gjurin e majtë gjatë përballjes Turqi-Francë, duke shkaktuar alarm si te kombëtarja franceze, ashtu edhe te Real Madridi.

Kapiteni francez shënoi në minutën e 54-t të takimit, duke i siguruar ekipit të Zinedine Zidane fitoren 1-0. Por vetëm pesë minuta pas golit, sulmuesi i Real Madridit u detyrua të linte fushën për shkak të dëmtimit.

Pas përfundimit të ndeshjes, vëmendja u përqendrua te gjendja fizike e Mbappes. Raportohet se ai ka dëmtuar gjurin e majtë, ndërsa stafi mjekësor i Francës pritet t’i kryejë ekzaminimet sot ose nesër (e diel). Në rast se testet bëhen sot, rezultatet pritet të shqyrtohen nesër në Valdebebas.

Zinedine Zidane ka dhënë një vlerësim shqetësues për gjendjen e sulmuesit.

“Dëmtimi i gjurit të Kylian Mbappes? Nuk është mirë. Mendoj se ai do të kthehet në Madrid. Nuk do të rrezikojmë”, deklaroi Zidane.

Trajneri francez u shpreh edhe më qartë kur foli për problemin fizik të yllit të Real Madridit.

“Gjendja e Kylian Mbappes nuk është e mirë. Ai ka pësuar një tejzgjatje të gjurit. Ai nuk është në rregull”, theksoi tekniku francez.

Tashmë priten rezultatet e kontrolleve mjekësore, të cilat do të përcaktojnë shkallën e dëmtimit dhe periudhën e mundshme të mungesës së Mbappes.

Për Real Madridin, këto ekzaminime do të jenë vendimtare për të mësuar nëse sulmuesi do të jetë i gatshëm për ndeshjet e ardhshme.//