Zbulohen gjobat e Ligës Premier – Sa kushton një karton i verdhë për futbollistët e nivelit të lartë?

Ish-futbollisti Ben Foster ka treguar shumën që paguajnë lojtarët e Ligës Premier sa herë që marrin karton të verdhë në fushë.

Portieri i vjetër i Manchester United ka ndarë disa fakte pak të njohura nga bota e futbollit profesionist, duke theksuar se dënimi financiar për një karton të verdhë është identik në të gjitha nivelet e futbollit anglez.

Sipas rregulloreve të Federatës Angleze të Futbollit (FA), tarifa për një karton të verdhë është rreth 12 euro dhe zbatohet njësoj si për lojtarët amatorë, ashtu edhe për ata që luajnë në kategorinë më të lartë. Pra, edhe një yll me pagë miliona euro paguan po aq sa një futbollist i ligave të ulëta.

Kjo çështje u ngrit në episodin më të ri të podcastit të Fosterit, Fozcast, kur bashkëprezantuesi Tom Ochoa shprehu kritika ndaj lojtarëve që, pasi gjyqtari bie bilbilin, e shtyjnë topin disa metra larg dhe ndëshkohen me karton të verdhë.

Foster, 43 vjeç, u përgjigj duke treguar vlerën e saktë të gjobës.

“Nëse do ta bësh, atëherë më mirë merr një karton të verdhë si duhet. Duhet të paguash rreth 12 euro. Edhe profesionistët e paguajnë këtë, sepse është gjobë e FA-së”, tha ish-portieri i Manchester United.

Nga ana tjetër, Ben Tozer, ish-lojtar i shquar i Wrexhamit, shtoi se për një karton të kuq gjoba arrin rreth 60 deri në 70 euro.

Foster theksoi se pagesa është e detyrueshme në çdo rast dhe e quajti shtyrjen e topit pas bilbilit një sjellje të papjekur.