Yoro ndez optimizmin te tifozët: Manchester United mund ta fitojë Ligën Premier

Leny Yoro është i bindur se Manchester United duhet të hyjë në sezonin 2026/27 me synimin për t’u kurorëzuar kampion i Ligës Premier.

Skuadra po bëhet gati për edicionin e parë të plotë me Michael Carrickun në krye. Ai e mori drejtimin në janar, pas shkarkimit të Ruben Amorimit, dhe e riktheu ekipin në luftën për pozitat e para të tabelës.

Në kohën e largimit të Amorimit, Unitedi mbante vendin e gjashtë. Më pas, Carrick siguroi 12 fitore në 17 ndeshje të Ligës Premier, krahas tri barazimeve dhe vetëm dy humbjeve. Kjo ecuri e shkëlqyer i solli emërimin si trajner i përhershëm.

Nëse kampionati do të llogaritej nga 13 janari, dita kur Carrick mori skuadrën, Manchester United do ta kishte fituar titullin me 39 pikë në 17 takime. Kjo shifër do të ishte tri pikë më e lartë se ajo e Arsenalit, që në fund të sezonit u shpall kampion.

Sipas Yoros, i njëjti ritëm duhet të vazhdojë edhe gjatë sezonit të ri.

“Pa dyshim. Duke qenë se përfaqësojmë Manchester Unitedin, duhet të kemi pikërisht këtë mentalitet”.

“E di gjithashtu se kemi potencialin e nevojshëm për ta realizuar, ndaj na takon ta bëjmë”.

“Brenda ekipit mbizotëron një atmosferë shumë e mirë. Jemi duke punuar fort, ndërsa fryma është jashtëzakonisht pozitive edhe jashtë fushës”.

“Këtë sezon synojmë të fitojmë çdo ndeshje dhe të bëhemi skuadra më e mirë. Personalisht, dua të paraqitem mirë në secilin takim, të ngremë trofe dhe të qëndrojmë në krye”, deklaroi Yoro.

Mbrojtësi francez kaloi nga Lille te Manchester Unitedi në vitin 2024. Deri tani, ai numëron 53 paraqitje në Ligën Premier, ndërsa sezonin e kaluar luajti në 32 ndeshje, në 14 prej të cilave hyri nga banka rezervë.

Gjatë verës, Manchester United ka luajtur tri takime miqësore. Fillimisht humbi 1-0 përballë Wrexhamit, përpara se të triumfonte 5-0 ndaj Rosenborgut dhe 2-1 kundër Atletico Madridit.

Takimi i ardhshëm i ekipit të Carrickut është planifikuar për të shtunën e ardhshme në Gothenburg, ku përballë do të ketë kampionin e Evropës, Paris Saint-Germain.