Yan Diomande udhëton drejt Madridit, së shpejti firmos si transferimi më i shtrenjtë në historinë e Realit

Yan Diomande është nisur drejt Madridit për të finalizuar kalimin nga RB Leipzig te Real Madridi. Lajmi për udhëtimin e sulmuesit anësor nga Bregu i Fildishtë u bë i ditur nga gazetari i njohur Fabrizio Romano.

Futbollisti që pritet t’i bashkohet Real Madridit po udhëton së bashku me agjentët Nathan Campbell dhe Kareem Gbaja.

Përpara hedhjes së firmës është publikuar edhe fotografia e parë ekskluzive. Kontrata e Diomande me klubin madrilen do të jetë e vlefshme deri në qershor 2032.

Kostoja e përgjithshme e operacionit, përfshirë bonuset, parashikohet të arrijë nga 130 deri në 140 milionë euro. Kjo shumë do ta kthente Diomande në blerjen më të shtrenjtë të realizuar ndonjëherë nga Real Madridi.

Sipas të dhënave aktuale të Transfermarkt, renditja e transferimeve më të kushtueshme të Real Madridit kryesohet nga Jude Bellingham me 127 milionë euro. Pas tij vijnë Eden Hazard me 120.8 milionë euro, Gareth Bale me 101 milionë euro, Cristiano Ronaldo me 94 milionë euro dhe Aurelien Tchouameni me 80 milionë euro.

Gjatë sezonit të fundit me RB Leipzig, Diomande regjistroi 36 paraqitje, realizoi 13 gola dhe kontribuoi me 10 asistime. Vlera e tij reale në treg përllogaritet në 90 milionë euro.