Yamal habit me rrëfimin për Rashfordin: “Nuk e kuptonte ende peshën e kësaj ndeshjeje

Lamine Yamal ka ndarë një koment të veçantë për Marcus Rashfordin gjatë një interviste të hapur dhënë për mediat spanjolle.

Gjatë bisedës me Movistar, 19-vjeçari trajtoi tema të ndryshme, mes tyre edhe shanset për të fituar Topin e Artë në vitin 2026. Ai foli gjithashtu për përvojën e tij me racizmin, duke rrëfyer se është përballur me të “një mijë herë”.

Yamal, i cili këtë sezon ka realizuar shtatë gola në gjashtë paraqitje në La Liga, e solli në vëmendje Rashfordin kur po shpjegonte peshën që ka rivaliteti mes Barcelonës dhe Real Madridit.

“E mbaj mend kur pashë Rashfordin në El Clasicon e tij të parë. Mendova se ende nuk e kishte kuptuar rëndësinë e vërtetë të asaj ndeshjeje”, është shprehur Yamal.

Sipas tij, kuptimi i rivalitetit u bë i qartë për sulmuesin anglez në përballjen e dytë. “Në ndeshjen e kthimit ai e kuptoi çfarë do të thotë një Clásico, pasi shënoi nga gjuajtja e lirë dhe luajti me një intensitet krejt tjetër”, ka deklaruar Yamal për Movistar.

“Kur je rritur te La Masia, që në El Clasicon të parë e kupton peshën e saj. E di se bëhet fjalë për një betejë të pastër”, ka shtuar talenti i Barcelonës.

Kjo deklaratë mund t’i befasojë tifozët, duke qenë se Rashford ka qenë pjesë e dy rivaliteteve të mëdha të Premier Leagues gjatë periudhës së tij te Manchester Unitedi, në përballjet me Manchester Cityn dhe Liverpoolin.

Sezonin e kaluar, reprezentuesi anglez luajti 49 ndeshje për Barcelonën si i huazuar nga Manchester Unitedi. Kontributi i tij prej 14 golash dhe 15 asistimesh ndihmoi katalunasit ta mbronin titullin e La Ligës.

Rashford u përfshi në tri përballje mes Barcelonës dhe Real Madridit. Në fitoren e Barcelonës ndaj rivalit madrilen më 10 maj, ai shënoi dhe regjistroi një asistim, rezultat që i siguroi klubit titullin e La Ligës.