Vllaznia reagon pas barazimit në Elbasan: “Kërkojmë gjykim të drejtë dhe transparencë

Pas barazimit 1–1 ndaj Elbasanit në stadiumin “Elbasan Arena”, Klubi i Futbollit Vllaznia ka publikuar një deklaratë zyrtare, ku shpreh shqetësimin për disa episode të ndodhura gjatë ndeshjes.

Sipas klubit shkodran, këto rrethana kanë ndikuar negativisht në klimën sportive dhe në zhvillimin normal të takimit.

Vllaznia thekson se ndeshja duhej të luhej pa tifozë, në zbatim të një vendimi të organeve disiplinore, por në tribunën VIP ndodheshin persona që gjatë gjithë sfidës fyen dhe provokuan lojtarët dhe përfaqësuesit e klubit.

Klubi pretendon se personat përgjegjës për organizimin, sigurinë dhe mbarëvajtjen e ndeshjes nuk ndërhynë në mënyrën e duhur. Për Vllazninë, një situatë e tillë është e papranueshme, sidomos në një takim që duhej të zhvillohej pa praninë e publikut.

Një tjetër pikë e ngritur në deklaratë lidhet me standardin e arbitrimit.

Vëmendje e veçantë i kushtohet episodit të minutës së 34-t, kur Elbasani ishte në disavantazh 0–1. Në atë moment, lojtari Abas kreu një ndërhyrje shumë të rëndë ndaj futbollistit të Vllaznisë, Mehmetaj.

Klubi shkodran vlerëson se ndërhyrja mund të kishte pasoja serioze për shëndetin dhe karrierën e lojtarit të tij dhe se, të paktën, duhej të shqyrtohej në mënyrë të plotë përmes sistemit VAR.

Sipas Vllaznisë, mungesa e një reagimi proporcional ndaj këtij episodi ndikoi në rritjen e tensionit në fushë dhe dëmtoi besimin e lojtarëve dhe stafit ndaj nivelit të arbitrimit.

Në të njëjtën linjë, klubi kërkon që të analizohen me profesionalizëm dhe transparencë edhe dy golat e anuluar në minutat shtesë, përkatësisht në 90+2 dhe 90+6.

Vllaznia nënvizon se nuk kërkon privilegje apo favorizim, por vetëm garancitë që duhet t’i ofrohen çdo klubi dhe skuadre: drejtësi në gjykim, të njëjtin standard për të gjithë, zbatim të rreptë të rregullave dhe kushte që ruajnë integritetin e garës.

Klubi paralajmëron se episode të tilla, nëse nuk shqyrtohen dhe nuk trajtohen me përgjegjësi nga institucionet përkatëse, dëmtojnë besimin te gara, cenojnë frymën e fair-play-t dhe krijojnë tensione që nuk i shërbejnë futbollit shqiptar.

Vllaznia deklaron se do të vijojë të mbrojë investimin, punën dhe interesat e saj përmes rrugëve institucionale, ndërsa distancohet nga dhuna, fyerjet dhe çdo reagim që bie ndesh me vlerat e sportit. Në përfundim, klubi u bën thirrje të gjithë aktorëve të futbollit të kontribuojnë për një garë të drejtë, të respektueshme dhe të denjë.