Vinicius Jr nën presion te Real Madridi, Mourinho ndryshon qasjen ndaj brazilianit

Vinicius Jr po kalon një periudhë të vështirë te Real Madridi, ku paraqitjet e tij të dobëta në nisje të sezonit kanë shtuar presionin, ndërsa Jose Mourinho duket se nuk po e trajton më njësoj yllin brazilian.

Sipas MARCA, durimi i trajnerit me Viniciusin po vjen drejt fundit. Një tjetër dëshmi ishte derbi kundër Atletico Madridit, në të cilin braziliani u largua nga loja në minutën e 54-t pas një paraqitjeje zhgënjyese.

Kylian Mbappe, në të kundërt, e përfundoi ndeshjen duke qëndruar në fushë gjatë të gjitha 90 minutave. Për Viniciusin, ky ishte takimi i katërt radhazi ku zëvendësohet, pas përballjeve me Interin, Rayo Vallecanos dhe Elches.

Në fillim të sezonit, Mourinho kishte ndjekur një plan të kujdesshëm për menaxhimin e minutave të Viniciusit dhe Mbappes, por zhvillimet e fundit sugjerojnë se kjo strategji është ndryshuar.

Mbappe ka nisur si titullar në shtatë ndeshje këtë sezon, ndërsa Vinicius vetëm në tri. Francezi ka luajtur gjithsej 720 minuta, kurse braziliani ka regjistruar 652 minuta.

Edhe prodhimi ofensiv është dukshëm në anën e Mbappes. Sulmuesi francez numëron tetë gola në tetë paraqitje, ndërsa Vinicius ka realizuar një gol dhe ka dhënë tri asistime, përveç penalltisë që fitoi ndaj Real Betisit.

Me këto shifra, Vinicius renditet aktualisht vetëm në vendin e pestë mes golashënuesve të Real Madridit, pas Mbappes, Jude Bellinghamit, Arda Gulerit dhe Carlos Espit.

Madje, Espi ka shënuar më shumë se braziliani, ndonëse në pesë paraqitje ka luajtur vetëm 26 minuta.

Statistikat dhe zgjedhjet e fundit të Mourinhos e vendosin Viniciusin përballë nevojës për një reagim të shpejtë, nëse dëshiron të rikthejë formën dhe vendin e tij në formacionin e Real Madridit.