Vedat Muriqi afër rikthimit në Turqi, pritet ta zëvendësojë yllin e madh

Sulmuesi kosovar i Mallorcas, Vedat Muriqi pritet të rikthehet në Superligën e Turqisë gjatë afati kalimtar të verës.

Muriqi u largua nga Fenerbahce në verën e vitit 2020, me Lazion që pagoi plotë 21 milionë euro për yllin prizrenas.

Megjithatë, sulmuesi shtatlartë, i cili luan te Mallorca në La Liga, do të luajë sërish në Superligën e Turqisë nga vera e këtij viti.

Sipas gazetës turke Aksam, Muriqi është shumë afër që ta veshë sërish fanellën e Fenerbahces, pasi gjiganti turk ka zgjedhur ish-lojtarin e tyre si idealin për të përforcuar skuadrën.

Ndër informacionet e marra nga mediumi turk thuhet se edhe ylli i Kosovës është i prirur për t’u rikthyer në Turqi dhe dëshiron të kthehet në Fenerbahce nëse palët bien dakord.

Edin Dzeko, i cili është një nga emrat që ka mbështetur skuadrën e tij me golat që ka shënuar këtë sezon, mund të largohet në fund të sezonit drejt Arabisë dhe Muriqi shihet si pasues ideal.

Muriqi aktualisht ka një vlerë tregu prej 15 milionë eurosh.

Sulmuesi 30-vjeçar, i cili ka luajtur në 83 ndeshje me fanellën e Mallorcas për dy sezone, ka kontribuar deri tani me 27 gola dhe 9 asistime.