Van der Vaart godet De Jongun pas eliminimit të Holandës: Ishte paraqitja më e dobët e karrierës

Rruga e Frenkie de Jong në Kupën e Botës 2026 u mbyll në mënyrën më zhgënjyese, teksa Holanda u ndal nga Maroku vetëm pas gjuajtjeve të penalltive.

Mesfushori i Barcelonës ishte në formacionin titullar dhe luajti afro 110 minuta, por nuk la gjurmë në repartin e mesit, çka bëri që pas eliminimit të ishte ndër emrat më të sulmuar nga kritikat.

Rafael van der Vaart, ish-lojtar i përfaqësueses holandeze, reagoi ashpër ndaj 28-vjeçarit dhe e përshkroi paraqitjen e tij si më të dobëtën që kishte parë ndonjëherë prej tij.

“Frenkie de Jong luajti ndeshjen më të keqe që kam parë ndonjëherë prej tij”, deklaroi Van der Vaart.

Sidoqoftë, ish-ylli holandez nuk e vendosi të gjithë përgjegjësinë mbi mesfushorin e Barcelonës. Ai nënvizoi se vështirësitë taktike të Holandës, si edhe mungesa e ndihmës në mesfushë, ndikuan ndjeshëm në lojën e tij përballë një Maroku shumë të organizuar.

Në të njëjtën linjë ishin edhe analistë të tjerë në Holandë, të cilët vunë në diskutim performancën e De Jong. Jan Mulder kritikoi mënyrën e tij të lojës, duke thënë se ai tregoi tepër kujdes, u mbështet shumë te pasimet anësore dhe nuk mori sa duhet përgjegjësi në ndërtimin e aksioneve.

Megjithë reagimet e forta pas këtij eliminimi, Barcelona vijon ta çmojë lart mesfushorin. Brenda klubit katalanas mbetet bindja se një paraqitje e dobët nuk e lëkund statusin e De Jong si një prej liderëve të skuadrës.

Tashmë, lojtari holandez pritet të kthehet shpejt në Barcelonë për t’u bashkuar me përgatitjet parasezonale nën drejtimin e trajnerit gjerman Hansi Flick.