Tuchel planifikon një miqësore shtesë për Anglinë gjatë Botërorit 2026

Anglia po diskuton mundësinë e zhvillimit të një miqësoreje me dyer të mbyllura ndaj ekipit të MLS-së, Sporting Kansas City, me synimin që i gjithë grupi të mbetet në ritëm konkurrues gjatë Kupës së Botës 2026.

Sipas planit të propozuar, kjo ndeshje do të luhej mes takimit të parë të Grupit L ndaj Kroacisë në Dallas dhe sfidës së dytë kundër Ganës, e cila zhvillohet të martën e ardhshme.

Burime pranë Federatës Angleze të Futbollit kanë treguar se bisedimet vazhdojnë, por ende nuk është marrë një vendim përfundimtar as për kundërshtarin dhe as për hollësitë e organizimit.

“Tre Luanët” kanë ndjekur një model të ngjashëm edhe në përgatitjet për Botërorin, kur gjatë grumbullimit të tyre në Florida zhvilluan një ndeshje stërvitore private ndaj Miamit.

Në rast se realizohet përballja me Sporting Kansas City, ajo pritet të jetë e orientuar kryesisht për lojtarët që do të kenë pak minuta në fushë ose që nuk do të aktivizohen fare në ndeshjen me Kroacinë.

Përmes këtij takimi shtesë, stafi teknik i Anglisë do të synonte të mbante në nivel të mirë fizik të gjithë skuadrën, ndërsa futbollistët rezervë do të mbeteshin gati për fazat e ardhshme të turneut.

Anglia e hap aventurën e saj në Kupën e Botës përballë Kroacisë, më pas ndeshet me Ganën dhe e mbyll fazën e grupeve me sfidën ndaj Xhamajkës.