Tirana do të luajë dy takime në shtëpi pa tifozë, klubi publikon njoftimin para sfidës me Vorën

Tirana ka bërë të ditur nëpërmjet rrjeteve sociale se, për shkak të vendimit të marrë nga Komisioni i Disiplinës, dy ndeshjet e ardhshme që do të zhvillojë në shtëpi gjatë këtij sezoni do të luhen pa spektatorë.

Takimi i parë që pritet të preket nga ky dënim është përballja me Vorën. Sfida është programuar të luhet të dielën, në orën 16:00, në stadiumin “Selman Stërmasi”. Vetëm pak ditë përpara këtij dueli, bardheblutë kanë publikuar komunikimin zyrtar, ku sqarojnë masën e vendosur nga Disiplina dhe zbatimin e saj në dy ndeshje.

Klubi shpreh keqardhjen që skuadra duhet t’i luajë këto takime pa përkrahjen e drejtpërdrejtë të tifozërisë, të cilën e cilëson si pjesë të pandashme të identitetit, historisë dhe forcës së KF Tiranës. Në të njëjtën kohë, nga bardheblutë është përcjellë edhe një mesazh për lojtarin me numër “12”.

Në njoftimin zyrtar, KF Tirana informon tifozët bardheblu dhe opinionin sportiv se Komisioni i Disiplinës dhe Etikës pranë FSHF-së e ka dënuar klubin me zhvillimin e dy ndeshjeve pa praninë e spektatorëve.

Si pasojë e këtij vendimi, takimi i radhës që Tirana do të luajë si pritëse do të zhvillohet me dyer të mbyllura dhe pa tifozë në stadium.

Bardheblutë ritheksojnë keqardhjen për mungesën e mbështetjes nga tribunat, duke nënvizuar se tifozëria ka qenë dhe vazhdon të jetë një element i pandashëm i identitetit, historisë dhe forcës së KF Tiranës.

Pa praninë tuaj në tribunë, por me mbështetjen tuaj në fushë.