Tifozët e Liverpoolit kërkojnë transparencë për investimin prej 1.4 miliardë funtesh nga konsorciumi i Bezos

Spirit of Shankly, unioni që përfaqëson tifozët e Liverpoolit, ka shprehur shqetësimin e tij për bisedimet mes Fenway Sports Group (FSG) dhe një konsorciumi ku përfshihet edhe themeluesi i Amazon, Jeff Bezos.

Grupi i drejtuar nga ish-drejtori i Queens Park Rangers, Amit Bhatia, po negocion me FSG-në për blerjen e rreth 30 për qind të aksioneve të Liverpoolit. Vlera e kësaj pjese të klubit mund të arrijë deri në 1.4 miliardë funte.

Pjesë e konsorciumit pritet të jetë edhe Eduardo Saverin, një prej bashkëthemeluesve të Facebookut. Sipas Forbes, Jeff Bezos është personi i tretë më i pasur në botë, me një pasuri të përllogaritur në rreth 207 miliardë funte, ndërsa pasuria e Saverin raportohet të jetë rreth 24 miliardë funte.

Interesimi i këtij grupi u bë publik për herë të parë në fund të korrikut. Pas raportimeve, Spirit of Shankly iu drejtua Liverpoolit për të kërkuar sqarime mbi marrëveshjen e mundshme dhe pasojat që ajo mund të ketë për klubin.

Në komunikimin e dërguar drejtuesve të Liverpoolit, tifozët kërkuan të dinin se kur FSG mendon ta mbyllë një shitje të mundshme dhe çfarë të drejtash do të marrë konsorciumi në këmbim të investimit. Në veçanti, ata kërkuan informacion mbi mundësinë e përfaqësimit në bord, shkallën e ndikimit në drejtimin e klubit, si dhe përfitimet financiare apo dividentët e mundshëm.

“Pas raportimeve të para për një shitje të mundshme të një pjese të aksioneve të LFC-së, Spirit of Shankly i shkroi klubit në fund të korrikut, duke kërkuar informacione të mëtejshme dhe më shumë qartësi se çfarë do të nënkuptonte një shitje e tillë”, thuhet në deklaratën e grupit.

Spirit of Shankly kërkoi gjithashtu të sqarohej nëse shitja e aksioneve është pjesë e një strategjie më të gjerë të FSG-së apo bëhet fjalë për një marrëveshje të veçantë. Tifozët kërkuan edhe arsyet që e kanë shtyrë FSG-në të shqyrtojë shitjen e një pjese të pronësisë së klubit.

“Ne gjithashtu kërkuam një takim dhe përsëritëm se, duke pasur parasysh ngjarjet që çuan në blerjen e klubit nga FSG, se kush e zotëron klubin dhe si kontrollohet ai, duke vendosur interesat e LFC-së dhe tifozëve të tij në radhë të parë, është thelbësore për të gjithë ne”.

“Raportimi i fundit për shitjen e 30 për qind të aksioneve dhe konsorciumin që po përpiqet ta blejë atë është domethënës. Pronësia dhe kujdesi ndaj klubit tonë janë parësore për SOS dhe të gjithë tifozët”, thuhet më tej në deklaratë.

Deri tani, Liverpooli nuk u është përgjigjur pyetjeve të parashtruara nga unioni i tifozëve. Klubi ka deklaruar megjithatë se mund të zhvillojë një takim me Supporters Board, nëse bisedimet me konsorciumin do të kalojnë në një fazë më zyrtare.