T’i bjerë kokës”, plas kritikat ndaj Florin Bratut te Partizani: S’mund të bëjë eksperimente çdo javë

Analisti i njohur sportiv Altin Sulçe, i cili moderon emisionin “Mega Sport” në A2CNN, ka shprehur kritika të ashpra në drejtim të trajnerit të Partizanit, Florin Bratu, duke ofruar një ilustrim të qartë se nga duhet nisur përmirësimi.

Sulçe thekson hapin e parë që duhet ndërmarrë: “Partizani duhet të fokusohet fillimisht te porta e vet, pra te reparti difensiv. Të stabilizojmë shtëpinë tonë, të sigurojmë hyrje-daljet. Ky është prioriteti absolut.”

Ai shton më tej duke paralajmëruar trajnerin rumun: “Nëse Florin Bratu synon të arrijë objektiva të larta me Partizanin, rruga është e qartë – duhet të ndalë së pësuari gola. Të marrësh tetë gola në katër takime është një sinjal i fortë alarmi.”

Në fund, moderatori i bën thirrje të hapur trajnerit të kuq për ndryshim menjëherë: “Trajneri duhet t’i bjerë kokës dhe të ndërgjegjësohet se drejton Partizanin. Nuk ka më vend për testime si në laborator në çdo ndeshje. Ai është i detyruar të aktivizojë lojtarët me përvojë në mbrojtje, të mbulojë hapësirat në mesfushë dhe pastaj sulmi do të gjejë rrugën drejt rrjetës.”