Tetë futbollistë të Tunizisë dolën pozitivë për doping në Kupën e Botës, dyshimet bien mbi mishin e kontaminuar

Kupa e Botës është përfshirë nga një rast i bujshëm dopingu, pasi tetë pjesëtarë të përfaqësueses së Tunizisë kanë rezultuar pozitivë, ndonëse sipas të dhënave të para nuk priten dënime me pezullim, sepse mendohet se burimi i problemit ka qenë mishi i kontaminuar.

Sipas The Times, në mostrat e tetë lojtarëve tunizianë janë zbuluar gjurmë të klenbuterolit, një përbërës që figuron në listën e substancave të ndaluara të Agjencisë Botërore Antidoping (WADA).

Kjo substancë përdoret për trajtimin e astmës, por për sportistët është e ndaluar, pasi mund të ndikojë në shtimin e masës muskulore dhe në reduktimin e yndyrës trupore.

Megjithatë, institucionet përkatëse nuk besojnë se futbollistët e kanë marrë me vetëdije këtë substancë të ndaluar. Dyshimi kryesor është se prania e klenbuterolit në organizmin e tyre lidhet me konsumimin e mishit të kontaminuar.

Gjatë kampionatit, kombëtarja tuniziane ishte e vendosur në Monterrey, ndërsa në disa zona të Meksikës janë raportuar raste të përdorimit të klenbuterolit në blegtori për të rritur masën muskulore të kafshëve dhe për të ulur përqindjen e yndyrës.

Pikërisht për këtë shkak, edhe më herët janë evidentuar raste të ngjashme të kontaminimit të pavullnetshëm te sportistë që kanë qëndruar në atë vend.

Identiteti i lojtarëve nuk është bërë publik dhe ndaj tyre nuk është hapur asnjë procedurë disiplinore.

Sa i përket ecurisë sportive, Tunizia e mbylli aventurën e saj në Kupën e Botës që në fazën e grupeve, duke përfunduar e fundit në Grupin F pas humbjeve kundër Suedisë, Japonisë dhe Holandës.

Pas disfatës së thellë 5-1 në ndeshjen e parë, trajneri Sabri Lamouchi u zëvendësua, ndërsa deri në përfundim të turneut skuadrën e drejtoi Herve Renard.

Ky episod mund të shërbejë si sinjal alarmi edhe për përfaqësueset e tjera që po qëndrojnë në Meksikë, mes tyre edhe Anglinë.

‘Tre Luanët’ do të zhvillojnë në atë vend një përballje të raundit të 16-tave ndaj ekipit vendas, ndaj stafi teknik pritet t’i kushtojë kujdes të veçantë regjimit ushqimor të futbollistëve për të shmangur çdo situatë të padëshiruar.