Tension në Portugali/ Çështja Ronaldos përplas mikun e CR7 me trajnerin: Ai i tha kaq shumë gënjeshtra dhe në fund u ndje i tradhtuar

Portugalia vijon me ritëm perfekt në Ligën e Kombeve, por fitorja e tretë radhazi nuk ka mundur të zbehë debatin rreth Cristiano Ronaldos.

Kombëtarja portugeze kryeson Grupin 4 me pikë të plota, por situata rreth kapitenit vazhdon të jetë në qendër të vëmendjes pas largimit të tij nga grumbullimi i ekipit.

Ronaldo ishte lënë në stol në ndeshjen ndaj Norvegjisë dhe, pasi mësoi se nuk do të aktivizohej as në sfidën ndaj Danimarkës, u largua nga kampi stërvitor i përfaqësueses.

Trajneri Jorge Jesus, megjithatë, nuk duket i gatshëm të ndryshojë qëndrim. Pas fitores ndaj Danimarkës, ai u shpreh se situata nuk ka ndikuar në bindjet e tij dhe se vazhdon t’u besojë vendimeve të marra.

“A më bën të ndihem në siklet çështja e Ronaldos? Ajo që më bën të ndihem në siklet është mosdija se si t’i vendos lojtarët e mi”, deklaroi Jesus.

Më tej, trajneri shtoi: “Mendoj se e kam ekipin në dorë dhe do të doja që i gjithë vendi të ishte pas meje”.

Në debatin për situatën është përfshirë edhe gazetari spanjoll Edu Aguirre, mik i hershëm i Cristiano Ronaldos.

Sipas raportimeve të publikuara nga mediat italiane, Aguirre ka pretenduar se mes Ronaldos dhe trajnerit ka pasur një përplasje pas vendimit për aktivizimin e sulmuesit.

“Ai i kërkoi falje privatisht dhe e siguroi se do ta bënte këtë publikisht. Pastaj, megjithatë, u shfaq në sallën e shtypit dhe bëri pikërisht të kundërtën, duke thënë një mori gënjeshtrash. Në atë pikë, Cristiano shpërtheu, sepse u ndje i tradhtuar”, raportohet të ketë thënë Aguirre.

Ndërkohë, edhe Renato Veiga, i cili është pjesë e përfaqësueses portugeze, pranoi se është shumë i afërt me Ronaldon, por nuk dha detaje për situatën.

“Jam shumë i afërt me Cristiano Ronaldon dhe ai e di që kam shumë dashuri për të. Por më është urdhëruar të mos flas për këtë. Nuk mund të flas për këtë”, deklaroi Veiga.

Portugalia vijon rrugëtimin në Ligën e Kombeve me rezultate perfekte, por vëmendja rreth përfaqësueses mbetet e përqendruar te e ardhmja e Ronaldos dhe marrëdhënia e tij me trajnerin Jorge Jesus.