Tension i fortë në fund të sfidës: Spalletti dhe Pisacane përjashtohen me të kuq

Përballja mes Juventusit dhe Cagliarit përfundoi me një barazim 1-1, por ajo që tërhoqi vëmendjen ishte konflikti i ashpër mes dy trajnerëve në momentet e fundit të ndeshjes, ku Luciano Spalletti dhe Fabio Pisacane morën kartonë të kuq nga gjyqtari kryesor.

Tensione u krijuan mes dy teknikëve, të cilët u përleshën verbalisht, ndërsa stafet e të dyja skuadrave u detyruan të ndërhyjnë për t’i ndarë. Pas këtij momenti, arbitri vendosi t’i përjashtojë të dy nga fusha e lojës.

Në intervistën e dhënë për “DAZN” pas takimit, trajneri i Juventusit sqaroi se nuk kishte ndodhur asgjë serioze dhe se thjesht i kishte bërë të qartë kundërshtarit se e njeh mirë taktikën e humbjes së kohës.

“Nuk ndodhi asgjë e veçantë. I thashë se janë një skuadër e mirë, që luan futboll të bukur, por gjithashtu dinë shumë mirë si ta humbasin kohën. Ai më pyeti se çfarë doja të thoja me këtë, dhe më pas na dha karton të kuq. Ishte diçka krejtësisht normale,” u shpreh Spalletti.

Përveç kësaj, tekniku italian theksoi nevojën që ekipi i tij të jetë më agresiv në duelet individuale për të siguruar fitoren në ndeshjet e ardhshme.

“Duhet të kuptojmë se duhet të jemi më të fortë në duele. Kohët e fundit po akordohen shumë pak faulle. Duhet t’u presim hapësirat kundërshtarëve, ashtu siç bëri Kolo Muani në minutat e fundit,” shtoi ai.

Ndërkohë, Zhegrova kishte një paraqitje pozitive pasi hyri në fushë, duke provuar disa herë të shënonte me goditje nga distanca, por portieri i Cagliarit ishte në një formë të shkëlqyer atë mbrëmje dhe i mohoi golin.