Superiorja hyn në fazën e dytë: Egnatia dhe Teuta rivalizojnë për kreun, ndërsa Partizani e Vllaznia kërkojnë mbijetesën

Faza e dytë e “Abissnet Superiores” nis ditën e nesërme, me programin e javës së 10-të të kampionatit. Ndeshja e parë e së dielës do të jetë ajo mes Tiranës dhe Egnatias, e planifikuar në stadiumin e Vorës në orën 13:00.

Më pas, në orën 18:30, do të luhen njëkohësisht dy përballje: Elbasani – Laçi dhe Skënderbeu – Vllaznia.

Java mbyllet të hënën me dy sfida të tjera. Vora do të presë Dinamon në orën 13:30, ndërsa në “Niko Dovana”, në orën 18:30, Teuta do të përballet me Partizanin.

Pas nëntë javëve të para, kampionati ka hyrë në një fazë ku rivaliteti është shtuar ndjeshëm. Tashmë lufta zhvillohet në tre drejtime kryesore: për vendin e parë, për zonën evropiane dhe për shmangien e rënies.

Egnatia dhe Teuta në garë për kreun

Klasifikimi i deritanishëm e ka përqendruar betejën për kreun kryesisht te Egnatia dhe Teuta. Të dyja skuadrat kanë shfaqur formën më të mirë në kampionatin shqiptar dhe paraqitjet e tyre në fushë i kanë vendosur në rolin e pretendenteve.

Ndërkohë, për Dinamon është ende herët për të nxjerrë një përfundim të tillë. Diferenca mes skuadrës së Durrësit dhe asaj të Rrogozhinës është vetëm 1 pikë, ndërsa vendi i tretë ndodhet 4 pikë më larg. Edhe pse kjo diferencë mund të përmbyset lehtësisht, vazhdimësia e rezultateve deri tani favorizon Egnatian dhe Teutën.

Rivalitet i madh për një vend në Evropë

Edhe lufta për zonën evropiane mbetet e hapur. Dinamo, Tirana, Elbasani, Laçi dhe Vora ndahen nga vetëm 4 pikë, ndërsa Elbasani, Laçi dhe Vora kanë të njëjtën kuotë pikësh.

Në këtë garë mund të përfshihet edhe Skënderbeu, megjithëse rruga e tij duket më e vështirë për shkak të luhatjeve të shfaqura gjatë kampionatit.

Partizani dhe Vllaznia përballë rrezikut

Situata më e papritur lidhet me zonën e mbijetesës, ku janë përfshirë edhe Vllaznia dhe Partizani. Të dyja skuadrat e nisën sezonin me objektiva të mëdha dhe me pritshmëri për të konkurruar në pjesën e sipërme të renditjes, por deri tani realiteti ka qenë krejt ndryshe.

Forma e tyre mbetet shqetësuese, ndërsa ndryshimet në pankinë nuk kanë sjellë zgjidhjen e menjëhershme të problemeve. Me rezultate të dobëta dhe pa një drejtim të qartë, të dyja ekipet po përpiqen të gjejnë një mënyrë për ta shpëtuar sezonin.

Për dy klube me traditë në elitën e futbollit shqiptar, përfundimi në këtë situatë do të ishte një goditje e fortë. Faza e dytë u jep mundësinë të largohen nga zona e rrezikshme dhe të mbijetojnë në një kampionat ku hierarkia mund të ndryshojë në çdo moment.

Për Vllazninë dhe Partizanin, ndërsa edhe Skënderbeu përballet me problemet e veta, beteja për të shmangur më të keqen nis që në javën e 10-të.