Shqipëria vuajti, por mposhti San Marinon dhe ngjitet në krye të Ligës C

Shqipëria ka siguruar një fitore të vështirë në shtëpi ndaj San Marinos, duke marrë tri pikët pas një përballjeje të vendosur vetëm në minutat shtesë.

Edhe pse konsiderohej favorite e padiskutueshme, Kombëtarja shqiptare triumfoi me rezultatin 2-1.

Avantazhi i kuqezinjve erdhi pas 11 minutash lojë, kur Kristjan Asllani realizoi një gol të shkëlqyer nga distanca.

Pas golit, Shqipëria ndërtoi disa aksione të rrezikshme, por Rey Manaj nuk arriti t’i konkretizonte.

Edhe San Marino pati një mundësi të mirë shënimi, por Dajsinani reagoi me një pritje të bukur dhe i mohoi golin kundërshtarit.

Miqtë befasuan në minutën e 66-të, kur Lazzari, pas asistimit të Capiicchionit, vendosi baraspeshën.

Pas këtij momenti, Shqipëria u hodh në sulm dhe krijoi rast pas rasti, por finalizimi mungoi.

Fitoren e vendosi sërish Asllani, i cili në minutën 90+3’ shënoi nga pika e bardhë, pasi një mbrojtës i San Marinos preku topin me dorë brenda zonës.

Me këtë sukses, Shqipëria merr kreun e grupit 1 në Ligën C të Ligës së Kombeve, me nëntë pikë. Bjellorusia dhe Finlanda kanë nga shtatë pikë, ndërsa San Marino mbetet pa pikë.