VIDEO/ Shqipëria triumfon 3-0 ndaj San Marinos dhe merr kreun e Ligës C

Shqipëria ka marrë tri pikët në transfertën ndaj San Marinos, në ndeshjen e vlefshme për xhiron e dytë të Ligës C.

Kuqezinjtë siguruan një fitore të pastër 0-3, duke zhvilluar një paraqitje bindëse gjatë gjithë takimit.

Epërsia u zhbllokua në minutën e 21-të, kur Anis Mehmeti shënoi nga afërsia pas asistimit të Rey Manajt. (GOLI I MEHMETIT)

Vetëm gjashtë minuta më vonë, Mryto Uzuni përfitoi nga një top i kthyer pas goditjes së Ernest Muçit dhe dyfishoi avantazhin e Shqipërisë. (GOLI I UZUNIT)

Golin e tretë dhe të fundit të sfidës e realizoi vetë Rey Manaj në minutën e 65-të, pas një aksioni të bukur të ndërtuar nga kuqezinjtë. (GOLI I REY MANAJ)

Ekipi shqiptar pati mundësi të shënonte edhe të paktën dy herë të tjera, por rastet e krijuara nuk u konkretizuan.

Pas kësaj fitoreje, Shqipëria kryeson e vetme me gjashtë pikë, dy më shumë se Finlanda, kundërshtari i radhës. San Marino mbetet në vendin e fundit pa pikë.