Shqetësime te Barcelona për talentin egjiptian, minutat e pakta në fokus të debatit

Sipas gazetës spanjolle Diario Sport, brenda Barcelonës ka filluar një diskutim i brendshëm lidhur me hapësirën e kufizuar që po i jepet sulmuesit të ri egjiptian Hamza Abdelkarim.

18-vjeçari konsiderohej si një prej talenteve që mund të shkëlqente gjatë këtij sezoni, pasi la gjurmë pozitive në periudhën përgatitore para nisjes së kampionatit me ekipin katalanas. Performancat e tij bindëse i mundësuan madje edhe një kontratë të re me përmirësime të ndjeshme.

Por fillimi i sezonit ka qenë ndryshe nga parashikimet për lojtarin e ri, i cili deri tani është aktivizuar vetëm në dy raste, me një total prej 12 minutash loje.

Një ndër faktorët kryesorë që ka ndikuar në pakësimin e minutave për Abdelkarimin është rivaliteti i ashpër në repartin sulmues.

Rendimenti i lartë i Raphinhas, i cili po përshtatet në një pozicion të ri si sulmues qendror, si dhe ardhja e Gabriel Jesusit, e kanë bërë më të vështirë për egjiptianin gjetjen e hapësirave në fushë.

Megjithatë, trajneri Hansi Flick e çmon shumë aftësinë e 18-vjeçarit, sidomos përkushtimin dhe sjelljen profesionale që ai demonstron çdo ditë në seancat stërvitore.

Ende nuk dihet nëse lojtari do të mund të sigurojë një rol më të spikatur në skuadër, duke marrë parasysh luftën e fortë për një vend titullari në formacion.

Më herët, Abdelkarim është shprehur i hapur për të luajtur edhe me ekipin e dytë të Barcelonës, nëse kjo do të ndihmonte në rritjen e tij si futbollist dhe do t’i siguronte më shumë minuta në fushë.