Sezoni 2026/27 i La Ligës nis sot pa Barcelonën dhe Real Madridin në xhiron hapëse

La Liga ngre siparin këtë fundjavë me një program jo të zakonshëm. Në xhiron e parë do të zhvillohen vetëm gjashtë ndeshje, ndërsa kampionët në fuqi, Barcelona dhe Real Madridi, nuk do të luajnë. Katër takime janë zhvendosur për në fund të gushtit, për shkak të pushimit të detyrueshëm që u takon lojtarëve pas Kupës së Botës.

Sezoni i ri i kampionatit spanjoll hapet sot, të shtunën në mbrëmje, me përballjen Deportivo Alaves-Getafe. Më pas në fushë do të zbresin Sevilla dhe Rayo Vallecano. Në xhiron hapëse do të luajnë gjithashtu Racing Santander, Espanyol, Deportivo La Coruna dhe Atletico Madrid.

Ndryshimi i kalendarit lidhet me marrëveshjen mes La Ligës dhe sindikatës së futbollistëve, AFE. Sipas saj, lojtarëve, kombëtaret e të cilëve arritën deri në gjysmëfinalet e Kupës së Botës, u garantohet një periudhë e detyrueshme pushimi.

Pushimi pas angazhimeve me kombëtaret ndikoi drejtpërdrejt në programin e sezonit. La Liga kishte kërkuar fillimisht që kampionati të niste më 15 gusht, edhe pse ligat e tjera kryesore evropiane e fillojnë sezonin më vonë. AFE e kundërshtoi këtë qëndrim, duke iu referuar marrëveshjes kolektive që u njeh futbollistëve të drejtën për pushim, raporton The Athletic.

Spanja e fitoi Kupën e Botës më 19 korrik, pasi mposhti Argjentinën. Për këtë arsye, emra si Lamine Yamal i Barcelonës dhe Marc Cucurella i Real Madridit përfituan të drejtën për një periudhë më të gjatë pushimi.

Pas negociatave që zgjatën disa muaj, më 9 qershor klubet e La Ligës e miratuan unanimisht shortin e xhiros së parë. Kalendari u konfirmua nga Federata Spanjolle e Futbollit më 30 qershor, ndërsa Real Madridi nuk mori pjesë në asnjë prej takimeve ku u morën këto vendime.

Një pjesë e futbollistëve kryesorë janë përfshirë vetëm së fundmi në përgatitjet e skuadrave, pasi përfunduan angazhimet verore me kombëtaret. Te Barcelona, Lamine Yamal, Pedri, Dani Olmo dhe Pau Cubarsi iu rikthyen stërvitjes vetëm të mërkurën. E njëjta situatë paraqitet edhe në Madrid.

Marc Cucurella nuk u aktivizua të mërkurën në miqësoren që Real Madridi e fitoi 1-0 kundër Deportivos. Në atë takim munguan gjithashtu Jude Bellingham, Kylian Mbappe dhe Aurelien Tchouameni.

Koha shtesë në dispozicion i mundëson Barcelonës të përgatitet më gjatë për mbrojtjen e titullit. Katalanasit do ta nisin sezonin kundër Elches të dielën, më 23 gusht. Një ditë më herët, të shtunën më 22 gusht, Jose Mourinho do të bëjë debutimin pas rikthimit në stolin e Real Madridit, në ndeshjen ndaj Espanyol.

Programi do të bëhet më i ngjeshur në ditët e fundit të muajit. Takimet e shtyra të Barcelonës dhe Real Madridit janë planifikuar për fundin e gushtit. Barcelona do ta presë Athletic Bilbaon të enjten, më 27 gusht, ndërsa një ditë më parë Real Madridi do të luajë në shtëpi kundër Real Sociedad.

Si pasojë e këtij organizimi, nga 15 deri më 31 gusht do të ketë ndeshje të La Ligës pothuajse çdo ditë. Gjatë këtij muaji takimet duhet të zhvillohen edhe në orare të vona, për shkak të temperaturave të larta në shumicën e qyteteve të Spanjës, me synimin për të mbrojtur shëndetin dhe sigurinë e lojtarëve.