Samir Nasri në qendër të hetimeve në Francë, ish-ylli i Arsenalit pyetet për pastrim parash dhe trafik droge

Samir Nasri, ish-futbollist i Arsenalit dhe Manchester Cityt, është pyetur nga policia franceze në kuadër të një hetimi të gjerë për pastrim parash, i lidhur me një rrjet të dyshuar të trafikut të drogës.

Sipas Le Parisien, ish-reprezentuesi i Francës qëndroi për rreth 10 orë në pyetje të enjten, si pjesë e hetimeve që përfshijnë dyshime për import droge, organizatë kriminale dhe pastrim të të ardhurave të siguruara nga trafiku i narkotikëve.

Megjithëse u mor në pyetje për një kohë të gjatë, 39-vjeçari u la i lirë në mbrëmje pa u ngritur asnjë akuzë zyrtare ndaj tij, ndërsa deri tani nuk ka nisur asnjë procedurë ligjore.

Hetuesit francezë po verifikojnë nëse Nasri ka pasur lidhje me një rrjet kriminal që dyshohet se drejtohej nga trafikanti i burgosur nga Marseille, Berrebouh, i njohur me nofkën “Derri i Egër”, i cili ndodhet në burg që nga viti 2021.

Sipas mediave franceze, një pjesë e çështjes është përqendruar te dyshimet për pastrim të organizuar parash nëpërmjet klubit të natës XS, që ndodhet në Ivry-sur-Seine, në periferi të Parisit.

Rreth vitit 2016, Nasri u bë aksionar në këtë lokal, pasi thuhet se investoi disa qindra mijëra euro në një periudhë kur luante për Manchester City dhe përfitonte paga milionëshe.

Më pas, ish-mesfushori francez u shndërrua në bashkëpronar të klubit të natës së bashku me Bilele Z., një person që sipas hetuesve konsiderohet pjesë e rrjetit të dyshuar kriminal dhe që po ashtu u ndalua nga policia të enjten.

Autoritetet franceze ndërkohë po vijojnë hetimet për të sqaruar nëse Nasri ka pasur ndonjë përfshirje në skemën e dyshuar të pastrimit të parave, por deri në këtë fazë ai nuk akuzohet për asnjë vepër penale.