Ronaldinho do të debutojë me Ravennën më 15 nëntor, synon golin e 300-të të karrierës

Ronaldinho pritet të bëjë një rikthim të papritur në futbollin aktiv, pas transferimit te Ravenna, klub që garon në Serie C të Italisë.

Ish-ylli brazilian, i njohur për teknikën e tij të jashtëzakonshme, do të ndërpresë pensionimin për të veshur fanellën e skuadrës së divizionit të tretë.

Kontrata u firmos gjatë kësaj vere, ndërsa debutimi i tij është programuar për 15 nëntor, në derbin ndaj Forlit.

Ronaldinho ka realizuar 299 gola në karrierën e tij, e cila shtrihet nga viti 1998 deri në vitin 2015. Prej tyre, 266 janë shënuar me klubet dhe 33 me kombëtaren braziliane. Synimi i këtij angazhimi të veçantë është që ai të regjistrojë golin jubilar të 300-të.

Megjithatë, rikthimi i paralajmëruar nuk është pritur me entuziazëm nga të gjithë tifozët e Ravennës. Klubi po garon për kreun e Serie C dhe disa mbështetës mendojnë se derbi është një ndeshje tepër e rëndësishme për iniciativa miqësore.

Në rrjetet sociale kanë qarkulluar edhe komente ironike. Disa tifozë parashikojnë se Ronaldinho do të marrë “penallti inekzistente”, do të shënojë dhe më pas do të zëvendësohet menjëherë, ndërsa të tjerë kanë bërë shaka se braziliani do të jetë më i interesuar për pushimet me birra dhe ushqime të lehta.

Pavarësisht kritikave, drejtuesit e Ravennës po e shfrytëzojnë maksimalisht ardhjen e një prej ikonave të futbollit. Në bashkëpunim me kompaninë Panini, klubi ka nxjerrë afishe ekskluzive koleksionuese kushtuar kësaj ngjarjeje.

Personat që gjejnë një replikë bronzi në paketat e reja do të fitojnë një kapelë të klubit. Replika e argjendtë shpërblehet me një fanellë të firmosur nga Ronaldinho, ndërsa ata që zbulojnë replikën e artë do të marrin një biletë për ndeshjen dhe mundësinë e një takimi personal me një nga futbollistët më të mëdhenj të të gjitha kohërave.